2025 жылдың қаңтарында Ұлттық статистика бюросы жүргізген жыл сайынғы зерттеудің нәтижесіне сәйкес, елдегі ересек халықтың 17,5%-ы темекі шегеді. Ал бір жыл бұрын бұл көрсеткіш 20,7% болған.
Зерттеу Астана, Алматы, Шымкент қалаларында және барлық облыстарда 12 мың үй шаруашылығын қамтыды. Сауалнамаға 15 жастан асқан азаматтар — әр отбасыдан бір өкіл қатысты.
Темекі шегушілердің үлесі жастың барлық топтарында дерлік төмендеген. Әсіресе, 29–48 жас аралығындағы қазақстандықтар арасында айтарлықтай азайған: 29–38 жастағылар арасында шылым шегушілер саны 5,5 пайызға, ал 39–48 жастағыларда — бес пайызға қысқарған. Осылайша, 2025 жылы бұл жастағы азаматтардың темекі шегу көрсеткіші тиісінше 19,3% және 22,7%-ды құрайды.
Алайда жасөспірімдер арасында жағдай керісінше өзгерген: 15–17 жас аралығындағы шылым шегушілердің үлесі 1,2%-дан 3,6%-ға дейін өскен.
Жас және жыныс бойынша бөлгенде, темекіні ең алдымен ер адамдар шегетіні байқалады — олардың арасында 34% шылым шегеді. Әйелдер арасында бұл көрсеткіш әлдеқайда төмен — небәрі 5%. Сондай-ақ, ауылдық жерлерде әрбір бесінші ересек адам (19,1%) темекі шегетін болса, қалаларда бұл көрсеткіш — 16,7%.
