Министрлік қызметкерінің айтуынша, айыпталушы жұмысқа орналасу кезінде жоғары білім туралы дипломын ұсына алмаған.
Мәдениет және ақпарат министрлігінің кадр ісіне жауапты қызметкері сот отырысында Перизат Қайраттың министрдің кеңесшісі қызметіне орналасуға тырысқанын айтты.
Қайрат құжаттардың толық емес топтамасын, соның ішінде өмірбаянын әкеліп, дипломын кейінірек тапсыратынын айтқан. Ол құжат Малайзиядағы университетте екенін айтқан.
Перизат Қайраттың жоғары білімі жоқ екені анықталған соң, оны жұмысқа қабылдау туралы бұйрық күшін жойған. Ал ұсынылған құжат жойылыпты.
Қайрат University of Nottingham мен Cambridge университеттерінде оқығанын айтқан, бірақ бұл сөзін растайтын ешқандай дәлел ұсынбаған.
17 шілдеде сотта Перизаттың құрбысы куәлік берді. Прокурор олардың жазысқан хабарламаларын оқып берді. Онда Перизат куәгерге: «Қазақстан дипломын жасап беретін таныстар бар ма?» деп жазған.
Прокуратураның мәлімдеуінше, Перизат Қайраттың жоғары білімі жоқ. Оның тек мектеп бітіргені жөнінде куәлік табылған.
Қайрат анасы екеуі 3,5 млрд теңгені жымқырды деп айыпталып отыр. Бұл іс бойынша 47 адам жәбірленуші деп танылған.
