Сеул, 4 тамыз (Reuters) — Оңтүстік Корея билігі дүйсенбі күні Солтүстік Кореямен шекара маңында антисолтүстік насихат жүргізуге арналған дауыс зорайтқыштарды бөлшектеуге кірісті. Бұл туралы Сеулдің Қорғаныс министрлігі мәлімдеді.
Бұл қадам ел президенті Ли Чжэ Мённың жаңа әкімшілігі екі ел арасындағы шиеленісті азайтып, Пхеньянмен қатынасты қалпына келтіруге бағытталған саясаты аясында жасалып отыр. Маусым айында қызметіне кіріскеннен кейін Ли әкімшілігі Солтүстік Корея режимін сынайтын хабарларды таратуды тоқтатты. Бұл — көрші елмен байланыс орнатуға арналған алғашқы қадамдардың бірі болған еді.
Алайда Солтүстік Корея бұл ұсыныстарды жақында кері қайтарып, Сеулмен диалог жүргізуге мүдделі еместігін мәлімдеді.
Айта кетейік, 1950–1953 жылдардағы Корей соғысы тек бітіммен аяқталғандықтан, қос ел әлі де ресми түрде соғыс жағдайында саналады. Соңғы жылдары олардың қарым-қатынасы айтарлықтай нашарлаған.
«Дауыс зорайтқыштарды бөлшектеу — бұл Оңтүстік пен Солтүстік арасындағы шиеленісті бәсеңдетуге бағытталған практикалық шара», — делінген Оңтүстік Корея Қорғаныс министрлігінің дүйсенбі күні таратқан мәлімдемесінде.
