Португалияның әйгілі футболшысы, "Порту" клубының және ұлттық құраманың бұрынғы қорғаушысы Жорже Кошта қайтыс болды. Бұл туралы клубтың баспасөз қызметі хабарлады.
Кошта 53 жасында өмірден озған. Ресми өлім себебі әлі нақтыланбады, алайда БАҚ пен әлеуметтік желілерде оның соңғы сағаттарын ауруханада өткізгені айтылуда.
Жорже Кошта "Порту" сапында ойнаған жылдары клубпен бірге УЕФА Кубогын және Чемпиондар Лигасын жеңіп алды. Ол сондай-ақ Португалия чемпионатын сегіз рет ұтып, ел футболының аңызына айналды. Ойыншы мансабын аяқтаған соң бапкерлікке бет бұрып, кейінірек "Порту" клубына спорт директоры ретінде қайта оралған.
"Порту" сапындағы ұлы жеңістер кезінде команданы басқарған Жозе Моуриньо қазіргі уақытта "Фенербахче" клубының бас бапкері. Чемпиондар Лигасының іріктеу кезеңіндегі "Фейеноордқа" қарсы матч алдындағы баспасөз мәслихатында журналистер Моуриньодан Коштаның өлімі туралы сұрағанда, әйгілі бапкер көз жасын тия алмады.
Футбол әлеміндегі ең танымал ойыншылардың бірі Криштиану Роналду да көңіл айтты.
«Кездескенше, Жорже Кошта. Мәңгі есте қаласың», – деп жазды ол әлеуметтік желіде.
Айта кетейік, Жорже Кошта 2002 жылы ұлттық құрамамен қоштасса, Роналду 2003 жылы Қазақстанға қарсы жолдастық ойында тұңғыш рет алаңға шыққан. Дегенмен олар Португалия чемпионаты аясында қарсылас болған болуы мүмкін — Кошта "Порту" сапында "Спортингке" қарсы ойнаған кездері Роналду қорғаушылардың бірін айналып өтуге тырысқан жас шабуылшы еді.
