Англияның қазіргі чемпионы «Арсенал» ел кубогы жарысында күтпеген жеңіліске ұшырады. Лондондық клуб Англия лигасы кубогінің 1/8 финалында төртінші дивизионда өнер көрсететін «Флитвуд Таунға» пенальти сериясында есе жіберді, деп хабарлайды Arasha.kz.
27 қазан күні өткен кездесудің негізгі уақыты 1:1 есебімен аяқталды. Ал пенальти сериясында алаң иелері 5:3 есебімен басым түсіп, жарыстың ширек финалына жолдама алды.
Бұл нәтиже ағылшын футболындағы маусымның ең күтпеген оқиғаларының біріне айналды. Өйткені «Арсенал» Премьер-лиганың қазіргі чемпионы болса, «Флитвуд Таун» деңгейі жағынан Англияның төртінші дивизионы саналатын Екінші лигада ойнайды.
Оның үстіне «Флитвуд» өз дивизионында да жоғары орындарға таласып жүрген жоқ. Команда турнир кестесінің төменгі бөлігінде орналасқан.
Соған қарамастан алаң иелері Еуропаның беделді клубтарының біріне қарсы батыл ойын көрсетті.
Кездесудің 21-минутында «Флитвуд Таун» футболшысы Аарон Лупало-Би есеп ашты. Ол қарсылас қорғаушысынан сытылып өтіп, допты қақпаға дәл бағыттады.
Бірінші таймда «Арсенал» есепті теңестіруге бірнеше мүмкіндік алғанымен, оны пайдалана алмады.
Үзілістен кейін лондондықтар шабуылды күшейтіп, 50-минутта таразы басын теңестірді. Виктор Дьёкереш қақпа маңындағы мүмкіндікті сәтті пайдаланып, есепті 1:1-ге жеткізді.
Осыдан кейін Микель Артета шәкірттері басымдықты өз қолына алғанымен, шешуші голды соға алмады.
Матчтың 85-минутында «Арсеналдың» жағдайы тіпті қиындай түсті. Команданың 16 жастағы футболшысы Макс Доуман қарсылас ойыншысымен болған қақтығыстан кейін тікелей қызыл қағаз алып, алаңнан қуылды.
Нәтижесінде лондондықтар кездесудің соңғы минуттарын он ойыншымен өткізуге мәжбүр болды.
Ойынның негізгі уақыты тең аяқталып, жеңімпаз пенальти сериясында анықталды.
Бұл кезеңде «Флитвуд Таунның» қақпашысы Джей Линч басты қаһарманға айналды. Ол «Арсенал» футболшысы Бруно Гимарайнстың соққысын қайтарып, өз командасына үлкен мүмкіндік сыйлады.
Ал шешуші пенальтиді Конор Хоги дәл орындап, алаң иелеріне тарихи жеңіс әкелді.
Осылайша, төртінші дивизионда өнер көрсететін «Флитвуд Таун» Англия чемпионын турнирден шығарып, клуб тарихында алғаш рет Лига кубогінің ширек финалына жолдама алды.
Айта кетейік, Микель Артета бұл кездесуге бірқатар негізгі футболшысын шығарған. Олардың қатарында Кай Хаверц, Виктор Дьёкереш және Юрриен Тимбер болды. Ал Мартин Эдегор екінші таймда алаңға шықты.
Матчтан кейін «Арсеналдың» бас бапкері Микель Артета ойыншыларының жігеріне шағымы жоқ екенін, алайда гол соғатын мүмкіндіктерді пайдалана алмағандарына көңілі толмағанын жеткізді.
Оның айтуынша, команда допқа көбірек иелік етіп, бірнеше қауіпті шабуыл ұйымдастырған. Дегенмен футболда нәтижеге жету үшін жасалған мүмкіндіктерді голға айналдыру қажет.
Бұл «Арсеналдың» төменгі дивизион өкілінен Лига кубогінде алғаш рет жеңілуі емес. 2012/2013 жылғы маусымда да лондондық ұжым төртінші деңгейдегі «Брэдфорд Ситиден» пенальти сериясында жеңіліп қалған еді.
