Түркістаннан Алматыға ұшатын әуе кемесіне отырғызу кезінде үлкен дау шықты. Жолаушы әйел әуе компаниясының қызметкерінен қазақ тілінде жауап беруді талап етіп, оның арты жанжалға ұласты, деп хабарлайды Arasha.kz.
Оқиға 17 тамызда Түркістан әуежайында FS7162 рейсіне отырғызу барысында болған. Тасымалдаушының ресми дерегінше, сөзге келу кезінде әйел әуежай қызметкерін итеріп жіберген.
Жағдай тез ушықты: арнайы қызметтер шақырылып, рейс шамамен үш сағатқа кешіктірілді. Жолаушы қызметкерлер мемлекеттік тілде сөйлеуі тиіс деп табандап тұрып алған, бірақ оның талабы орындалмаған. Оқиғаға қатысты видео әлеуметтік желілерде тарап кетті.
FlyArystan өкілдері куәгерлерден видеоны өшіруді талап еткен, бұл жұрттың теріс реакциясын тудырды. Компания өз ұстанымын былай түсіндірді:
«Тиісті қызметтер шақырылды. FlyArystan жерүсті қызметінің өкілі жағдайға ұшақ бортына отырғызу аяқталып қалған сәтте араласты. Ол жолаушыға мінез-құлық ережелерін түсіндірмек болды. Таратылған бейнежазба контекстен үзіп алынған. Әуежай қызметкері түсірілген жазбаны өшіруді сұрау тек жанжалды реттеу мақсатында жасалды».
Жолаушылардың айтуынша, дәл осы сөз таласы рейстің үш сағатқа жуық кешігуіне түрткі болған. Кадрда әйелдің тек тіл мәселесіне ғана емес, рейстің кешіккеніне де наразы болғаны көрінеді. Кейін компания қызметкері кешірім сұрады, содан соң ұшақ Алматыға ұшты.
