Ақмола облысының Щучинск қаласында №4 орта мектепте төтенше жағдай болды, деп хабарлайды Arasha.kz.
Мұғалімдер спортзалдың шешінетін бөлмесінде өз күштерімен жөндеу жұмыстарын жүргізіп жатқан. Электроқұралмен жұмыс істеп тұрған кезде «болгарка» дене шынықтыру мұғалімінің қолынан шығып кетіп, айналып тұрған диск аяғына тиген. Жарақат алған адамға сол жерде алғашқы көмек көрсетіліп, кейін жедел жәрдеммен ауруханаға жеткізілді.
Бұл оқиға тағы да бір өткір мәселені көтеріп отыр: педагогтар құрылысшы не жөндеушінің қызметін атқармауы керек. Олардың міндеті – балаларды оқыту, ал өздеріне тән емес іспен айналысып жүріп, денсаулығына қауіп төндіру емес.
Әсіресе, Қазақстанда «Педагог мәртебесі туралы» Заң қабылданғанын ескерсек, ол заң мұғалімдерді кәсіби міндеттеріне қатысы жоқ жұмыстарға тартуға тікелей тыйым салады.
Полиция департаменті бұл факт бойынша тергеу басталғанын хабарлады.
Щучинск мектебіндегі жағдайға облыстық білім және ғылым қызметкерлері салалық кәсіподағы да пікір білдірді.
«Мұндай жағдайларға жол беруге болмайды. «Педагог мәртебесі туралы» Заң қатаң сақталуы тиіс, ал мұғалімдерді кәсіби қызметіне қатысы жоқ жұмыстарға тарту – олардың құқықтарын бұзу болып саналады. Кәсіподақ бұл оқиғаны бақылауға алады», – деп атап өтті кәсіподақта.
