"Қазгидромет" РМК мамандары 30 тамызға арналған ауа райы болжамын жариялады. Мамандардың айтуынша, еліміздің бірнеше өңірінде күн қатты ысиды, ал кейбір аймақтарда жауын-шашынмен бірге найзағай соғады, деп хабарлайды Arasha.kz.
Синоптиктердің болжамына сәйкес:
- Жетісу және Алматы облыстарында ауа температурасы +37…+38°С-қа дейін жетеді;
- Маңғыстау облысында +40°С ыстық күтіледі.
Батыс антициклонының әсерінен Қазақстанның батысы, оңтүстігі және оңтүстік-шығысында жауын-шашынсыз ауа райы сақталмақ. Ал басқа аймақтарда атмосфералық фронттардың өтуіне байланысты жаңбыр жауып, найзағай ойнайды. Кей жерлерде бұршақ жаууы мен қатты жел тұруы ықтимал.
Сондай-ақ республика бойынша желдің күшеюі күтіледі. Оңтүстік-батыс, оңтүстік және орталық өңірлерде шаңды дауыл соғып, ал оңтүстік-батыс пен орталықта түнгі және таңғы уақытта тұман түсуі мүмкін.
