Алматы әуежайының әжетханасында ер адам өз тамағын кесіп жібермек болған. Ол мұны бөтелке сынығымен жасауға әрекеттенген, деп хабарлайды Arasha.kz.
Әуежайдың баспасөз қызметі оқиғаның ішкі рейстер терминалы T1-де болғанын хабарлады.
«Жолаушы әжетханада өзіне дене жарақатын салуға тырысқан. Әуежай қызметкерлері жағдайды дер кезінде байқап, жедел түрде медициналық қызметті шақырды. Жедел жәрдем бригадасы келгенге дейін жолаушыға алғашқы медициналық көмек көрсетілді. Қазіргі уақытта оның өміріне қауіп төніп тұрған жоқ, ол дәрігерлердің бақылауында» – делінген әуежайдың хабарламасында.
Әуежай жұмысы қалыпты режимде жалғасуда.
Ер адамның мұндай әрекетке баруына не себеп болғаны әзірге белгісіз.
Кейбір дереккөздерде жәбірленушіге алғаш болып көмекке Азаматтық авиация комитетінің бұрынғы төраға орынбасары Талғат Қасенов келгені айтылады. Ол әжетханадан шыққан түсініксіз дыбыстарды естіп, көмектесу қажеттігін түсінген.
Айта кетсек, санаулы күн бұрын дәл осы әуежайда ер адам өзін өртеп, қатты жарақат алған болатын.
