Украина парламентінің бұрынғы спикері Андрей Парубийді сенбі күні елдің батысындағы Львовта атып өлтірген. Қылмыскерді іздеу жұмыстары жүргізілуде, деп хабарлайды Arasha.kz.
Бас прокуратураның хабарлауынша, қарулы ер адам Парубийге бірнеше рет оқ атып өлтірген. Қылмыскер қашып кеткен, оған қатысты іздеу жарияланды.
54 жастағы Парубий парламент депутаты болған, 2016 жылғы сәуірден 2019 жылғы тамызға дейін парламент спикері қызметін атқарған. Сондай-ақ ол 2013–2014 жылдардағы Еуропалық одақпен тығызырақ байланыс орнатуды талап еткен наразылықтардың көшбасшыларының бірі болды.
2014 жылдың ақпанынан тамызына дейін ол Ұлттық қауіпсіздік және қорғаныс кеңесінің хатшысы болды. Сол кезеңде Украина шығысында соғыс қимылдары басталып, Ресей Қырым түбегін аннексиялаған еді.
Ресми тұлғалар әзірге бұл кісі өлтірудің Ресейдің Украинаға қарсы соғысымен тікелей байланысы бар-жоғына қатысты ешқандай нақты мәлімет берген жоқ.
Зеленский Парубийдің отбасына және жақындарына көңіл айтты және: «Қылмыскерді іздеу мен тергеу үшін барлық қажетті күш пен құрал жұмылдырылды», — деді.
