Украина қауіпсіздік қызметі ресейлік рэпер Тиматиді (шын аты – Тимур Юнусов) іздеуге жариялады. Бұл туралы ақпарат 8 қыркүйек, дүйсенбі күнгі жағдай бойынша Украина ІІМ іздеу базасында орналастырылған, деп хабарлайды Arasha.kz.
Әнші 1 шілдеден бері іздеуде, бірақ ресейлік БАҚ бұл жайға енді ғана назар аударды. Бұған дейін Тиматиге іздеу жарияланғаны хабарланбаған.
Украина қауіпсіздік қызметі маусым айында Тиматиге Украина уақытша оккупацияланған аумақтарына кіру тәртібін бірнеше рет бұзды деген айып таққан. Тергеу дерегінше, ресейлік рэпер Қырымда кемінде жеті рет концерт берген. Ресей бұл түбектің аннексиясын 2014 жылы жариялаған болатын.
УҚҚ мәлімдемесінде Тимати «ресейлік үгіт-насихаттың қатысушыларының бірі» екені айтылған. Ол 2012, 2018 және 2024 жылдары президенттік сайлауда Владимир Путиннің сенімді адамы болған.
«Сонымен қатар, Тимати Ресейдің агрессиясын, Қырым аннексиясын және Украинаның тәуелсіздігіне, егемендігіне және аумақтық тұтастығына қарсы жасалған өрескел құқықбұзушылықтарды қолдады», – делінген УҚҚ хабарламасында.
