Полиция дерегінше, оқ көршілес кампустың шатырынан атылған. 31 жастағы Чарли Кирктің қаза тапқанын Дональд Трамп растады. АҚШ президенті марқұмды «ұлы, тіпті аңызға айналған тұлға» деп атады. Трамп елде туларды түсіруді бұйырды, деп хабарлайды Arasha.kz.
«АҚШ-та жастарды Чарлидей ешкім түсініп, сезіне алмады. Оны барлығы жақсы көріп, құрметтеді, әсіресе мен. Енді ол арамызда жоқ. Мелания екеуіміз оның аяулы жары Эрикаға және отбасына көңіл айтамыз. Чарли, біз сені жақсы көреміз!» — деп жазды Трамп әлеуметтік желіде.
CBS мәліметінше, Кирк өлімге әкелген жарақатты Юта штатының Орем қаласындағы Юта алқабы университетінде күндізгі сөз сөйлеу кезінде алған. Полицияның айтуынша, оқ 180–200 метр қашықтықтан атылған. Бейнежазбаларда оқ атылған сәт естіліп, Кирктің құлап түскені, ал көрермендердің дүрбелеңмен қашқаны байқалады. Жараланған саясаткерді ауыр халде ауруханаға жеткізген, алайда екі жарым сағаттан соң қайтыс болды.
ФБР директоры Кэш Пателдің сөзінше, Кирктің күдікті қылмыскерін ұстаған, бірақ оның жеке басы әзірге жарияланбаған.
Чарли Кирк Turning Point USA ұйымының негізін қалаушы ретінде белгілі — ол АҚШ-тағы ең ықпалды консервативті студенттік қозғалыстардың біріне айналған. TPUSA-ның мақсаты жастар арасында оңшыл идеяларды, дәстүрлі құндылықтарды және экономикалық либерализмді насихаттау еді. Кирк шешендігімен танылды, радиода, подкасттарда сөз сөйлеп, телеарналарға шығып, АҚШ Республикалық партиясының съездеріне қатысқан.
