Украина әскери қызметкерлері Запорожье бағытында Ресейдің Су-34 ұшағын жойды. Әуе күштерінің хабарлауынша, жау ұшағы Запорожье қаласына басқарылатын әуе бомбаларын қолданып террористік шабуыл жасаған, деп хабарлайды Arasha.kz.
Украина қорғаушылары ресейлік Су-34 ұшағын 25 қыркүйек күні таңғы сағат 04:00-де атып түсірген.
Әскерилердің нақтылауынша, Су-34 жауынгерлік тапсырманы орындау кезінде жойылған.
Су-34 — Ресейдің Су-27 жойғышы негізінде жасалған аса жылдам алдыңғы шептік бомбалаушы. Ол құрлықтағы және теңіздегі нысандарды кез келген ауа райында, күндіз де, түнде де жоюға арналған.
Ұшақ экипажы екі адамнан тұрады, басқарылатын әуе бомбалары мен «әуе-жер», «әуе-әуе» сыныптарындағы зымырандарды қоса алғанда, кең ауқымды қару түрлерін алып жүре алады.
Бұл ұшақ Ресей тарапынан Украинаға қарсы соғыста азаматтық және әскери инфрақұрылымдарға соққы беру үшін белсенді қолданылып жүр.
