ФБР-дың бұрынғы басшысы Джеймс Комиге екі қылмыстық бап бойынша айып тағылды – Конгреске жалған куәлік беру және әділ сот төрелігіне кедергі келтіру, деп хабарлайды Arasha.kz.
Трамптың алғашқы мерзімі кезінде оның штабының Ресеймен ықтимал байланыстарын тергеген Коми – қылмыс жасады деп айыпталған ФБР-дың алғашқы бұрынғы директоры атанды.
Оған тағылған айыптар 2016 жылғы АҚШ сайлауына Ресейдің ықтимал араласуына қатысты істі Сенаттың сот істері жөніндегі комитетінде 2020 жылы берген жауабымен байланысты.
АҚШ бас прокуроры Пэм Бонди: «Заңнан жоғары тұратын ешкім жоқ», – деп мәлімдеді. Оның айтуынша, айыптау қорытындысы АҚШ Әділет министрлігінің билікті теріс пайдаланғандарды жауапқа тартуға деген ұмтылысын көрсетеді.
Федералдық прокурор Линдси Халлиганның сөзінше, кінәлі деп танылған жағдайда Комиге бес жылға дейін бас бостандығынан айыру жазасы кесілуі мүмкін. Ол бұл қызметке бірнеше күн бұрын АҚШ президенті Дональд Трамптың тағайындауымен келген еді.
«Бұл ел тарихындағы ең жаман адамдардың бірі – бұрынғы жемқор ФБР басшысы Джеймс Коми», – деп жазды Трамп Truth Social желісінде. – «Ол ұзақ уақыт бойы халқымызға зиян келтірді, енді міне, халыққа қарсы қылмыстары үшін жауапқа тартылатын уақыт жетті».
Ал Джеймс Коми айыптауға қатысты Instagram парақшасында: «Сот отырысын өткізейік. Сенімді жоғалтпаңыздар», – деп пікір білдірді.
«Менің жүрегім Әділет министрлігі үшін ауырады, бірақ мен федералдық сот жүйесіне қатты сенемін және мен кінәсізбін», – деп қосты ол.
Айта кетейік, 2018 жылы Трамп Коми «түрмеде отыруы керек» деген болатын. Ал 2017 жылы оны ФБР басшысы қызметінен босатқан еді.
