ҚР Еңбек және халықты әлеуметтік қорғау министрлігі Қарттар күніне орай қызықты статистикамен бөлісті. Ведомство деректеріне сәйкес, елімізде жасы 100-ден асқан 448 азамат бар. Олардың ең үлкені Ұлытау облысында тұрады. Ол 115 жасқа толған, деп хабарлайды Arasha.kz.
— Ең көп ұзақ жасаушылар еліміздің ең ірі қаласы Алматыда тұрады, мұнда жасы 100-ден асқан 58 адам бар. Ұзақ жасаушылар саны бойынша екінші орында Түркістан облысы тұр. Онда жасы 100-ден асқан 53 тұрғын бар. Үшінші орында Алматы облысы, мұнда жасы 100-ден асқан 37 адам бар. Ең қарт қазақстандықтардың үштігіне Ұлытау облысының тұрғыны – 115 жас, Павлодар облысының тұрғыны – 113 жас, Жамбыл облысының тұрғыны – 110 жасқа келген азаматтар енді, — делінген ведомство хабарламасында.
Әлемде жыл сайын 1 қазанда Халықаралық қарттар күні аталып өтеді. Бұл мерекені БҰҰ Бас Ассамблеясы 1990 жылғы 14 желтоқсанда өткен 45-сессиясында жариялаған.
Айта кетейік, Қазақстанның кейбір өңірлерінде Қарттар күніне орай жергілікті бюджет есебінен бір реттік жәрдемақы төленеді. Алайда батысқазақстандық зейнеткерлерге мұндай төлемдер қарастырылмаған.
