Ескіқорған ауылында оқушылар төбесі құлап, едені шіріп кеткен апатты ғимаратта оқуға мәжбүр, деп хабарлайды Arasha.kz.
Бұл ғимаратты ауыл тұрғындары 70 жыл бұрын саманнан өз қолдарымен салған. Енді төртінші ұрпақ балалар осы қираған жерде білім алып жүр. Қабырғалары жарылып, кірпіштері жерге түсіп жатыр, спортзалдың орнына тот басқан турник қана тұр, ал су орнына аулада тұрған бөшкеге кезекке тұрады, деп жазды Orda.kz.
«Төбе жоқ, едені шұрық тесік. Тіпті қаңғыбастардың баспанасы бұдан жақсы шығар. Дәл осы жерде балалар оқиды. Бәрі құлап, біреу қаза тапқанда ғана, бәлкім, ғимаратты апатты деп мойындайтын шығар. Ал қазір еш негіз жоқ дейді. Мектеп қызыл кірпіштен емес, кәдімгі саманнан салынған. Бәрі қопарылып жатыр, тіпті іргетасы да жоқ», – дейді ауыл тұрғыны Дастан.
Қазір бұл жерде бастауыш сыныптың 54 баласы оқиды. Ата-аналар балаларын сабаққа жіберуге қорқады. Үзіліс кезінде оқушылар арамшөп пен өртелген қоқыс үйіндісінің арасында ойнайды, қоңырау әрең жұмыс істейді. Әжетхана – сырттағы ағаш қора.
«Балалар күнде жылап келеді. Біреудің аяғы тесікке түсіп кетеді, біреуі құлайды. Біз оларды мұнда жіберуге қорқамыз. Облыс әкімі биыл жаңа мектептің құрылысы басталады деп уәде берген. Бірақ әлі іргетасы да қаланбаған», – дейді ауыл тұрғыны Толқын Әлімова.
Уәде беріліп келе жатқанына 20 жыл болды. Шенеуніктердің айтуынша, бәрі қаржыландыруға байланысты.
«Білім басқармасы төрт құжат дайындады. Енді мәселе сессияда қаралады, содан кейін қаржы бөлінсе, құрылыс басталады. Мемлекеттік сараптама қыркүйекте ғана аяқталды, құжаттар бірден басқармаға берілді. Бәрі ақшаға байланысты», – деп түсіндірді Келес ауданы құрылыс, сәулет және қала құрылысы бөлімінің басшысы Нұрмұхамед Нархозиев.
Тек ауыл тұрғындарының наразылығынан кейін ғана әкімдік мектепті уақытша жабуға келісті. Балаларды көрші ауылға апаратын болды. Билік оларға тегін автобус беруге уәде етті.
