21 қазанда іссапар барысында ҚР ІІМ Киберқылмысқа қарсы іс-қимыл департаменті Ресей Федерациясының ІІМ Киберполиция басқармасымен бірлесіп, ұзақ мерзімді жедел шаралар нәтижесінде Ресейдің үш өңірінде интернет-алаяқтардың әрекетіне тосқауыл қойды, деп хабарлайды Arasha.kz.
Тергеу мәліметінше, күдіктілер Қазақстан мен ТМД елдерінің азаматтарына бағытталған алаяқтық қоңырауларды ұйымдастыру үшін SIM-карталарды жеткізу және қосу арнасын құрған.
Арнайы операция барысында 11 sim-box құрылғысы, 3 ноутбук, 31 ұялы телефон және 19 мыңнан астам қазақстандық пен еуропалық SIM-карта тәркіленді. Тексеру кезінде ноутбуктерден 2023 жылдың басынан бері іске қосылған абоненттік нөмірлер туралы ақпарат сақталған лог-файлдар табылған. Бұл нөмірлер алаяқтық мақсатта қолданылғаны анықталды.
Заңсыз іс-әрекеттерге қатысы бар деген күдікпен Ресейдің төрт азаматы ұсталды. Қазір тергеу және жедел-іздестіру шаралары жалғасып жатыр.
ІІМ мәліметінше, бұл бірлескен операция SIM-карталарды заңсыз жеткізу арнасын жойып, трансұлттық ұйымдасқан топтың қызметін тоқтатуға, азаматтарды алаяқтық схемаларға тартудың алдын алуға және халықаралық киберқылмысқа айтарлықтай соққы беруге мүмкіндік берді.
ҚР ІІМ Киберқылмысқа қарсы іс-қимыл департаменті бастығының орынбасары Аслан Өскембаевтың айтуынша:
«Біздің бірлескен әрекеттеріміз халықаралық деңгейдегі интернет-алаяқтарға тосқауыл қоюға және азаматтардың қауіпсіздігін қамтамасыз етуге бағытталған».
