Алматыда №224 мектепке қатысты дау қайтадан өршіп тұр. Білім ордасы әлі ашыла қоймағанымен, оқыту тілі қазірдің өзінде дауға айналды. 27 қазан күні Бостандық ауданының ондаған тұрғыны әкімдікке жиналды. Олар жаңа мектеп тек қазақ тілінде болуы керек деп талап етуде, деп хабарлайды Arasha.kz.
Ауданда жаңа тұрғын үйлер салынып жатыр. Халық саны артып келеді. Алайда қазақ тілінде оқытатын мектептер жетіспейді. Ата-аналардың айтуынша, олардың балалары жылдар бойы кезекте тұрады.
«Мектеп те, емхана да жетіспейді. Сондықтан мұнда мектеп салынады дегенде қатты қуандық. Әуелде оның қазақ мектебі болатынын айтқан. Менің үш балам бар. Қыста олардың бірін таңертең, екіншісін түсте көлікпен тасимын. Уақытым түгел соған кетеді», — дейді қала тұрғыны.
Қазір Бостандық ауданында қазақ сыныптары бар тек бір ғана мектеп бар, оның өзі аралас. Ал онда орын жоқ.
«Ұлымды амалсыз жеке мектепке бердім. Бір жыл бойы айына 200 мың теңгеден төледім. Тек екінші сыныпқа келгенде мемлекеттік мектепке өте алдық. Қазақ сыныптарына сұраныс өте жоғары», — дейді Жұлдыз Бағлан.
Ата-аналар жаңа №224 мектеп аралас болуы мүмкін екенін естіген соң наразылықтарын білдіре бастады.
