Атырау облысында мүгедектігі бар қарт әйелдің бетіне сірке суын шашып, үйінен зергерлік бұйымдарды ұрлаған. Зейнеткерге шабуыл жасаған күдікті ұсталды. Бұл туралы Atyrau.Today тelegram-арнасы жазды, деп хабарлайды Arasha.kz.
«Белгісіз әйел II топтағы мүгедек жергілікті қарт әйелдің үйіне кіріп, бетіне сірке суын шашқан. Шабуылдан кейін зардап шегушінің көру қабілеті күрт нашарлап, көзі химиялық күйік алған. Зұлым әйел үйден алтын бұйымдарды алып, қашып кеткен», — делінген хабарламада.
Зардап шегушінің қызы анасының жағдайы ауыр күйінде екенін айтты.
«Анамның көздері күйіп кеткен. Жағдайы нашар, бірақ дәрігерлер оны үйге жіберген», — деді ол.
Атырау облысы полиция департаментінің баспасөз қызметі хабарлағандай, 27 қазанда Жылыой аудандық полиция бөлімінің кезекші бөліміне Қошшақыл ауылында тұратын тұрғын шабуыл туралы хабарлаған.
Басқармада расталғандай, белгісіз әйел үйге кіріп, 62 жастағы әйелдің бетіне өткір иісі бар сұйықтық шашып, зергерлік бұйымдарды ұрлап, оқиға орнынан қашып кеткен.
Жедел іздестіру іс-шараларының нәтижесінде полиция күдікті 55 жастағы әйелді ұстап, полиция бөліміне жеткізіп, уақытша ұстау изоляторына қамаған.
«Зардап шегуші медициналық көмек көрсетілгеннен кейін үйіне шығарылды. Оның өмірі мен денсаулығына қауіп жоқ», — деп хабарлады полиция департаменті.
Құқық қорғау органдары күш қолданумен жасалған қарақшылық дерегі бойынша сотқа дейінгі тергеу жүргізіп жатыр.
