Польшада жарылыс ұйымдастыруға дайындалды деген айыппен ұсталған ресейлік саяси эмигрант, «Ашық Ресей» қозғалысының бұрынғы координаторы Игорь Рогов Ресейдің Федералдық қауіпсіздік қызметімен (ФСБ) ұзақ жылдар бойы байланыста болғанын тергеу кезінде өзі айтқан. Бұл жөнінде «Вот так» басылымы істің айыптау қорытындысына сүйеніп хабарлады.
Айыптау материалдарында көрсетілгендей, Рогов Ресейден кетпей тұрып-ақ ФСБ-мен жұмыс істей бастаған. Оның айтуынша, оппозициялық акциялардың бірінен кейін белгісіз күштік құрылым өкілі оны тоқтатып, университеттегі мәселелерін шешіп беруге уәде еткен. Талап — ресейлік оппозиция туралы тұрақты есеп жіберу.
Осыдан кейін Рогов құпия келісімге қол қойып, ФСБ-ге ақпарат тасуды бастады.
Тергеу құжаттарында Роговтың Саранск қаласындағы ФСБ-ге қарасты пәтерде тұрақты түрде кездесулер өткізгені айтылған. Кейіннен ол өзінің «қызметі» үшін жүйелі түрде ақша алып отырған: сыйақы тоқсан сайын төленіп тұрған.
Рогов 2022 жылы соғыс басталғаннан кейін Польшаға көшіп, саяси баспана алғанымен, ФСБ-мен жұмысын жалғастырғанын мойындаған. Ол шетелге кеткен ресейлік оппозициялық топтардың белсенділігі, олардың ұйымдастырушысы және эмигранттарға арналған халықаралық бағдарламалар туралы ақпарат жинап отырған.
Тергеу материалында Роговтың әйелі Ирина оның бұл әрекетін білгені, бірақ өзі ФСБ-мен жұмыс істемегені көрсетілген.
2024 жылдың жазында Польша құқық қорғаушылары Игорь Роговты жарылыс дайындады деген күдікпен қамауға алды. Кейін оның жұбайы да ұсталып, оған тыңшылық және қылмысқа көмектесу баптары бойынша айып тағылды.
Прокуратураның мәліметінше, Роговқа 8 жылға дейін бас бостандығынан айыру жазасы берілуі мүмкін. Соттағы алғашқы тыңдау 8 желтоқсанға белгіленген.
