АҚШ дайындаған соғысты аяқтау жоспарының толық мәтіні БАҚ-та жарияланғаннан кейін, бұл құжатқа Еуропа саясаткерлері пікір білдіре бастады. Олар жоспардың әзірленуіне қатыспаған, деп хабарлайды Arasha.kz.
Еуропалық дипломатия басшысы Кая Каллас Reuters агенттігіне ЕО Украинаның ұзақ мерзімді әрі әділетті бейбітшілігін қамтамасыз ететін кез келген жоспарды қолдайтынын айтты.
«Біздің түсінуімізше, бұл жоспар президент Зеленскийге ұсынылды. Қандай да бір жоспардың іске асуы үшін оған Украина да, еуропалықтар да келісуі керек екенін үнемі айтып келдік», — деді Каллас.
Германияның сыртқы істер министрі Йоханн Вадефуль АҚШ ұсынған жобаны Мәскеу мен Киев талқылауы тиіс мәселелер тізімі ретінде қабылдайтынын айтты, бірақ оны дайын финалдық құжат деп санауға болмайды, деп хабарлайды Reuters.
«Германияның позициясы — Еуропаның позициясы. Бұл Украинаны қолдаймыз деген сөз. Украина бұл тармақтарды күшті позициядан талқылай алуы маңызды», — деді Вадефуль.
Финляндия президенті Александр Стубб X желісіндегі жазбасында: «Қазір біз жағдайды одақтастарымыз және Украинамен бірге бағалап жатырмыз. Мен бұл мәселені премьер-министрмен, сыртқы істер министрімен талқыладым және үкіметпен де сөйлесемін», — деп жазды.
Politico дереккөздерге сүйене отырып, Украина СІМ басшысы Андрей Сибига Брюссельдегі ЕО сыртқы істер министрлерімен кездесуде бұл жоспардың шарттарын ресейлік тарап анықтағаны айқын екенін айтқан.
«Егер қандай да бір бейбіт жоспар агрессорды тыныштандыруға негізделсе, оны жүзеге асыру мүмкін емес. Мұндай тәсіл тек жаңа соғысқа және Украина мен бүкіл Еуропадағы қатыгездікке әкеледі», — деген Сибига.
Wall Street Journal мәліметінше, Еуропа көшбасшылары Украина үшін анағұрлым қолайлы балама бейбіт жоспар әзірлеп жатыр. Құжат жақын күндері дайын болады деп күтіледі.
CNN Украинада жұмыс істейтін еуропалық дипломатқа сілтеме жасап, бұл жоспар Еуропа үшін толық күтпеген жағдай болғанын хабарлады. Оның айтуынша, Вашингтондағы еуропалық дипломаттардың әріптестері де құжат дайындалып жатқанынан хабарсыз болған.
«Білуі тиіс адамдардың өзі ештеңе білмеген... Бұл жағдай қатты ашу мен түсінбеушілік тудырып отыр», — деді CNN дереккөзі.
