Украиналық делегация Женевада өткен соғысты тоқтату жөніндегі консультациялар аясында Ұлыбритания, Германия және Франция өкілдерімен кездесті. Сондай-ақ келіссөздерге АҚШ мемлекеттік хатшысы Рубио мен Дональд Трамптың арнайы өкілі Уиткофф та келген, деп Arasha.kz тілшісі Deutsche Welle басылымына сілтеме жасап хабарлайды.
Украина президенті Владимир Зеленскийдің мәлімдеуінше, Женевада Украинадағы соғысты тоқтатуға бағытталған халықаралық консультациялар өтіп жатыр. Ал украин делегациясын басқаратын Президент кеңсесінің басшысы Андрей Ермак келіссөздердің "тұрақты және әділетті бейбітшілікке" жеткізуге бағытталғанын атап өтті.
"Ұлыбритания, Франция және Германия жетекшілерінің ұлттық қауіпсіздік жөніндегі кеңесшілері – Джонатан Пауэлл, Эммануэль Бонн және Гюнтер Зауттермен алғашқы кездесуді өткіздік. Келесі кездесу – АҚШ делегациясымен. Келіссөздердің барысы конструктивті өтіп жатыр", – деді Ермак әлеуметтік желідегі жазбасында.
Оның айтуынша, бүгін әртүрлі форматта тағы бірнеше кездесу жоспарланған.
Канада премьер-министрі Марк Карни де өзінің ұлттық қауіпсіздік жөніндегі кеңесшісі Женевадағы консультацияларға қатысатынын хабарлады. Ал Карнидің өзі сол күні кешке украин президентімен жеке сөйлесуді жоспарлап отыр.
Украина президенті Зеленский әлеуметтік желіде Женевадағы кездесулерге жоғары баға беріп, дипломатиялық процестің қайта жанданғанын атап өтті.
"Швейцарияда соғысты аяқтау жолдарын талқылауға арналған жұмыс топтары жиналып жатыр. Дипломатияның белсендірілуі — жақсы белгі. Украин және америкалық топтар, сондай-ақ еуропалық әріптестеріміз тығыз байланыста. Нақты нәтижеге қол жеткіземіз деп сенемін. Қанды қырғынды тоқтату және соғыстың қайта басталуына жол бермеу қажет. Бүгінгі келіссөздердің қорытындысын асыға күтемін. Барлық тарап конструктивті болады деп үміттенемін. Бізге ортақ оң нәтиже керек", – деді Зеленский.
