Киевте 28 қарашада НАБУ мен САП қызметкерлері Украина президенті Владимир Зеленскийдің кеңсе басшысы Андрей Ермактың пәтерінде және үкімет кварталындағы офисінде тінту жасады. Ермак бұл ақпаратты растады, тергеуге толық қолдау көрсетіп жатқанын айтты, деп хабарлайды Arasha.kz.
Антикоррупциялық іс «Энергоатомдағы» жемқорлық схемасына байланысты қозғалған. Тергеу нұсқасы бойынша, ұйымдастырушы ретінде Зеленскийдің серіктесі Тимур Миндич аталады. Ол мердігерлерден келісімшарттың 10–15 пайызы көлемінде «үлес» талап еткен деген күдікке ілінді. Іс «Мидас» атауымен жүргізіліп жатыр.
Осы іс аясында бұрынғы вице-премьер Алексей Чернышов, министрлік кеңесшілері және «Энергоатом» топ-менеджерлері қамауға алынған. Бұл жағдай әділет және энергетика министрлерінің отставкасына әкелді.
Миндич қамауға алынар алдында шетелге қашып кеткен. Оның пәтерінде бірнеше миллион доллар табылғаны хабарланды. Саясаткерлердің айтуынша, Ермак тергеуде «Али-Баба» деген кодтық атпен аталады. Тінтуден кейін оның отставкасын талап еткендер де шықты.
