Астанада Dent Park Ortho клиникасының анестезиолог-дәрігері Аида Жұмағалиеваға қатысты сот жалғасып жатыр, деп хабарлайды Arasha.kz.
Тіс емханасында көз жұмған үш жасар қыздың ісі бойынша тәуелсіз педиатр сарапшыдан жауап алынды. Бақыт Мусинаның айтуынша, балаға наркоз салуға мүлде болмайтын жағдай болған.
Отырыста сондай-ақ тергеу үшін қорытынды берген мамандар сұралды. Астана тәуелсіз сарапшылары қауымдастығының мүшесі келтірген дерекке сәйкес, тіс емдеуге келген қыз ауыр хәлде болған: жүдеп-жадаған, анемиясы бар, бронхтарында айқын қабыну байқалған, тіпті іріңді бронхит болуы мүмкін. Қан талдаулары да бактериялық инфекцияны көрсеткен.
«Бәрін тоқтату керек еді. Осындай клиникалық жағдайда, бала жуырда тыныс жолы инфекциясын өткергенде, ең алдымен педиатрға жіберу қажет. Ол рентгенге жіберуді немесе антибиотик тағайындауды шешуі тиіс», — деді Бақыт Мусина.
Маманның айтуынша, қыз стоматологияға дейін көп дәрі қабылдаған, бұл аллергиялық тәуекелді күшейткен. Осы факторлардың барлығы қосылып, наркоз кезінде қауіпті асқынулар туғызып, өлімге әкелуі мүмкін.
2024 жылғы 30 қазанда Dent Park Ortho клиникасында балаға 18 тісті емдеу үшін «Севоран» препаратымен төрт жарым сағат наркоз берілген. Ояна бастаған кезде баланың жүрегі тоқтап қалған.
Реанимациялық шаралар нәтиже бермей, кішкентай қыз қайтыс болды.
