АҚШ Украинаға 15 жыл мерзімге қауіпсіздік кепілдігін ұсынды, бұл кепілдіктер кейін ұзартылуы мүмкін екенін Украина президенті Владимир Зеленский мәлімдеді, деп хабарлайды Arasha.kz.
Оның айтуынша, Киев бұдан да ұзақ мерзімге үміттенеді, алайда 15 жылдық кепілдік те бүгін 28 желтоқсанда өтетін АҚШ президенті Дональд Трамппен кездесуде келісілсе, «үлкен жетістік» болмақ.
Украина президенті екі ел де қауіпсіздік кепілдіктерін өздерінің заң шығару органдарында ратификациялауға ұсынатынын айтты. Қосжақты келісімдердің негізгі тұстары қазірдің өзінде келісіліп, бес құжатта бекітілген, оларға алтыншы құжат қосылуы мүмкін.
Сонымен қатар Украина басшысы Ресей кемінде 60 күнге атысты тоқтатуға келіссе, «бейбітшілік жоспарының» ережелерін жалпыұлттық дауыс беруге шығаруға дайын екенін жеткізді. Оның сөзінше, саяси, логистикалық және қауіпсіздікке байланысты қиындықтарды ескергеннің өзінде бұл мерзім референдум өткізуге жеткілікті.
