Сеул – Астана бағыты бойынша ұшып шыққан Air Astana ұшағы барлық дәретхана кабиналарының істен шығуына байланысты Пекин қаласына мәжбүрлі қону жасады, деп хабарлайды Arasha.kz.
Бұл ақпаратты әуекомпанияның баспасөз қызметі растады.
Журналист Михаил Козачков өзінің Telegram-арнасында хабарлағандай, жолаушылар Қытай әуежайының ұшу аймағында күтіп отыр. Оларға құрғақ азық-түлік пен су берілген.
Сондай-ақ жолаушыларды қонақүйге орналастырып, келесі күні таңертең Астанаға жөнелту жоспарланып отырғаны айтылған.
2025 жылғы 26 желтоқсанда Фукуок – Алматы бағыты бойынша ұшқан Air Astana ұшағы да барлық дәретхана кабиналарының істен шығуына байланысты техникалық себеппен ұшу әуежайына кері қайтқан болатын.
