Кеше кішкентай Шекоман ауылында 8 жасар бала жоғалып кетті. Оны соңғы рет сағат 14:30-да көрген, деп хабарлайды Arasha.kz.
Райянды іздеуге жергілікті тұрғындар, әкімдік қызметкерлері мен полицейлер шықты. Жоғалған баланы тек кешкісін тапты.
Мәлім болғандай, ол құдыққа, дәлірек айтқанда, бетон плитаның астындағы тесікке құлап кетіп, онда бірнеше сағат бойы отырған.
Баланы құдықтан аман-есен шығарып алды, медициналық көмек қажет болмады.
Баланың анасы іздеу жұмыстарына қатысқандардың барлығына алғысын білдірді.
Абай облыстық Полиция департаменті кейінірек баланы табуға бейнебақылау камералары көмектескенін хабарлады.
Бейнежазбалар арқылы учаскелік полицей Алмас Бесенбеков пен ауылдық округ әкімі Нұркен Жәрлікенов баланың қай бағытқа кеткенін бақылап, оның шамамен қай жерде болуы мүмкін екенін анықтаған.
