Қызылорда төрінде Мемлекет басшысы Қасым-Жомарт Тоқаевтың төрағалығымен Ұлттық құрылтайдың бесінші отырысы өз жұмысын бастады. Бұл жиын — ел болашағына қатысты маңызды шешімдер қабылданатын, қоғам мен билік арасындағы ашық диалогтың басты алаңына айналды, деп хабарлайды Arasha.kz.
Мемлекеттік кеңесші Ерлан Қариннің айтуынша, құрылтай жанынан құрылған жұмыс топтары тек ұсыныс айтып қана қоймай, нақты іске көшкен. Бүгінде 53 тармақтан тұратын арнайы жоспар бекітіліп, оның аясында ауқымды жұмыстар атқарылуда.
Құрылтай бастамаларының өміршеңдігін заңнамалық қолдаудың арқасында Парламент депутаттарымен бірлесе отырып 6 жаңа заң қабылданды. Олардың ішінде қоғам үшін ең маңызды мәселелер қамтылған:
- Балалардың қауіпсіздігін нығайту және заңсыз контентке тосқауыл қою шаралары күшейтілді.
- Қоғамдық орында бет-жүзді бүркейтін киімдерге тыйым салу және нысандарға атау беруді жүйелеу бойынша заңнамалық түзетулер енгізілді.
- Археология саласын реттейтін жаңа ережелер бекітілді.
Қазіргі таңда бұл жұмыс тоқтап қалмай, тағы 10 заң жобасы қаралып жатыр.
Биылғы жұмыстың ең елеулі нәтижесінің бірі — Тәуелсіз Қазақстан тарихында тұңғыш рет ішкі саясаттың негізгі қағидаттары мен құндылықтарын айқындайтын концептуалды құжаттың қабылдануы.
Өткен жылдың қараша айында Президент қол қойған бұл Жарлық еліміздің идеологиялық бағытын жүйелейтін басты темірқазыққа айналды. Құжатты әзірлеуге еліміздің белгілі сарапшылары мен қоғам белсенділері атсалысып, ұлттың жаңа саяси мәдениетінің негізін қалады.
Қызылордадағы жиын Ұлттық құрылтайдың жай ғана кеңесу органы емес, елдің даму қарқынын белгілейтін нақты институционалдық күшке айналғанын тағы бір мәрте дәлелдеді.
