Елордалық құтқарушылар Сарыарқа ауданындағы көпқабатты үйлердің бірінде шыққан өртті ауыздықтады. Оқиға Щорс көшесінде орналасқан 10 қабатты тұрғын үй кешенінде орын алған, деп хабарлайды Arasha.kz.
Төтенше жағдайлар департаментінің мәліметінше, қызыл жалын 5-қабаттағы пәтерлердің бірінен шыққан. Оқиға орнына жедел жеткен мамандар баспалдақ арқылы 30 тұрғынды қауіпсіз жерге шығарды, оның ішінде 10 бала бар.
Өрт сөндірушілердің кәсіби іс-қимылының арқасында 5 шаршы метр аумақты шарпыған тілсіз жау 20 минуттың ішінде толық сөндірілді. Қазіргі уақытта мамандар өрттің шығу себебін анықтап жатыр.
