Желіде бокстан Олимпиада чемпионы, Қарағанды облыстық дене шынықтыру және спорт басқармасының басшысы Серік Сапиев пен оның орынбасары — самбо және жауынгерлік самбодан Азия және әлем чемпионатының жүлдегері Дәурен Есімхановтың арасында төбелес болғаны туралы ақпарат тарап жатыр, деп хабарлайды Arasha.kz.
«Қарағанды қаласының 42 жастағы тұрғынының арызы бойынша ұрып-соғу дерегіне қатысты қылмыстық іс қозғалды. 21 қаңтарда қаладағы спорт кешендерінің бірінің ғимаратында екі ер адамның арасында жанжал шыққаны анықталды. Қазіргі уақытта полиция қызметкерлері оқиғаның барлық мән-жайын анықтап жатыр», — деп жауап берді Қарағанды облысы полиция департаменті.
Алайда, тәртіп сақшылары төбелеске қатысушылардың аты-жөнін нақты атамады. «Өзге ақпарат тергеу мүддесіне байланысты жария етуге жатпайды», — деп түсіндірді құқық қорғау органдары.
Ал @Koza4kov_BOT арнасының жазуынша, Серік Сапиев пен оның орынбасары, джиу-джитсудан әлем чемпионы Дәурен Есімхановтың арасындағы жанжал дене жарақатын салумен аяқталған.
