Қазақстан Президенті Қасым-Жомарт Тоқаев Қаржылық мониторинг агенттігінде өткізген жиында коммерциялық банктердің заңсыз немесе күмәнді операцияларына бақылауды күшейту қажеттігін мәлімдеді, деп хабарлайды Arasha.kz сайты Ақордаға сілтеме жасап.
«Жақында Агенттік төрағасы Әлиманов маған бір қазақстандық банктің әрекеті туралы баяндады. Сол банк арқылы 2025 жылы көрші елден басқа мемлекеттерге 7 триллион теңгеден астам қаржы «өткен». Заң, экономика, тіпті саясат тұрғысынан алғанда, бұл — өте сорақы факт», — деді Президент.
Мемлекет басшысы қаржылық алаяқтық схемаларына қатысты мұндай фактілердің әлі де аз еместігіне қынжылыс білдірді.
«Өкінішке қарай, мұндай жағдайлар әлеуметтік салаға да жетті. Мемлекет қаржысын ашықтан-ашық ұрлау мен теріс пайдалану көлемі адам айтқысыз деңгейге жетіп отыр», — деп толықтырды Тоқаев.
Еске сала кетейік, бұған дейін Астананың беделді бизнес-орталықтарының бірінде екі жыл бойы заңсыз криптовалюта алмастыру пункті жұмыс істегені хабарланған болатын. Бұл істі ұйымдастырған екі ер адам сотталды. Олардың қолдарынан барлығы 7 млрд теңгеден астам қаражат өткен.
