Қазақстан қор биржасындағы (KASE) соңғы бірнеше күндегі сауда-саттық қорытындысы бойынша теңге нығаюын жалғастырып жатыр, деп хабарлайды Arasha.kz.
Кеше бағам психологиялық тұрғыдан маңызды 1 доллар үшін 500 теңгелік белгіден төмен түсті. 4 ақпан күні түсте теңге 498,15 деңгейінде болса, 5 ақпанда доллар бағамы 492 теңгеге дейін төмендеді.
Теңгенің нығаю процесі доллар 549 теңге болған қазан айының басынан бері байқалып келеді. Бұл үрдіс мемлекеттік қарыз нарығына шетелдік инвесторлардың келуімен, сондай-ақ Ұлттық банктің және экспорттық түсімнің бір бөлігін сатуға міндеттелген мемлекеттік компаниялардың валюта сатуымен байланысты. Доллар бағамы соңғы рет өткен жылдың наурыз айында 500 теңгеден төмен болған еді.
Алматыдағы ақша айырбастау пунктерінде доллар 496–502 теңге аралығында сатылуда.
Сарапшылар мұны салық кезеңінің әсерімен түсіндіреді: бұл уақытта компаниялар, әсіресе экспорттаушылар, бюджетке төлем жасау үшін теңгені белсенді түрде сатып алады.
Applied Economic Research Centre (AERC) сарапшылары жылдық орташа бағам 546 теңге болады деп болжаса, Halyk Finance жыл соңына қарай доллар 580–590 теңгеге дейін көтерілуі мүмкін деп есептейді.
