Амур облысында Ромнен ауданында жоғалып кеткен Robinson маркалы жеке тікұшақты іздеу жұмыстары жалғасып жатыр. Әуе кемесі 19 ақпан кешінде байланысқа шықпай қалған. Бортта құқық қорғау органдарының қызметкерлері болған. Оқиғаға байланысты қылмыстық іс қозғалды, деп хабарлайды Arasha.kz.
Шығыс-Сібір көлік прокуратурасының мәліметінше, тікұшақ Амаранка ауылынан 130 шақырым қашықтықтағы орман алқабынан ұшып шығып, Ромны ауылына бағыт алған. Жол үстінде экипажбен байланыс үзілген. Қадағалау органы ұшу қауіпсіздігі бойынша тексеріс бастады. Ал Тергеу комитеті "Әуе көлігін пайдалану және қозғалыс қауіпсіздігі ережелерін бұзу, абайсызда екі немесе одан да көп адамның өліміне әкеп соққан" бабы бойынша қылмыстық іс қозғады.
Тікұшақта үш адам болған: бір ұшқыш және екі құқық қорғау органы қызметкері. Олар тайгада жүргізілген жедел-іздестіру шараларынан кейін кері қайтып келе жатқан.
Амур облыстық ТЖМ мәліметінше, Благовещенск қаласынан Ромнен ауданына жедел топ, іздестіру-құтқару жасағы және аэромобильді бөлімше жіберілген.
Құтқарушылар төрт топқа бөлініп, қарда жүретін көліктермен іздеу жүргізіп жатыр. Ауадан аумақты Ми-8 тікұшағы тексеруде. Аймақта көріну деңгейі жақсы болғанымен, жолдардың болмауы, қалың қар және күрделі жер бедері жұмысты қиындатуда. Аудан шекарасы арқылы Становой жотасы өтеді.
