Израиль барлау қызметі АҚШ президенті Дональд Трамп пен америкалық жоғары лауазымды шенеуніктерге қастандық жасалуы мүмкін екенін ескерткен. Барлау мәліметтеріне сәйкес, Иран ұшқышсыз ұшу аппараттарының көмегімен шабуыл ұйымдастыруды жоспарлаған болуы ықтимал, деп хабарлайды Arasha.kz.
Израильдің Israel Hayom газетінің мәліметінше, елдің сыртқы барлау қызметі – «Моссад» АҚШ-тың Орталық барлау басқармасына (ЦРУ) ықтимал қауіп туралы ақпарат берген. Басылымға сұхбат берген жоғары лауазымды израильдік және америкалық шенеуніктердің айтуынша, АҚШ арнайы қызметтері Израильден тиісті мәліметтерді тексеруді сұраған. Осыдан кейін «Моссад» қауіпке қатысты барлау ақпаратын америкалық әріптестеріне жеткізген.
Ақпарат көздері Иранның болжамды жоспары Дональд Трампқа ғана емес, оның әкімшілігіндегі бірқатар жоғары лауазымды тұлғаларға да бағытталғанын айтады. Атап айтқанда, шабуыл жасау үшін ұшқышсыз ұшу аппараттары пайдаланылуы мүмкін екені хабарланған.
АҚШ-та шенеуніктердің қауіпсіздігі күшейтілді
Israel Hayom басылымының жазуынша, ықтимал қауіп туралы ақпараттан кейін Вашингтонда бірқатар қауіпсіздік шаралары қабылданған.
Қауіп төнуі мүмкін деп есептелген шенеуніктер көпшілік қатысатын ашық іс-шараларға баруын шектеген. Ал кейбірі уақытша үйлерінен арнайы күзетілетін нысандарға көшірілген.
Басылым мәліметінше, қауіпсіздік шаралары күшейтілген тұлғалардың бірі – АҚШ қаржы министрі Скотт Бессент.
Ол Иранға қарсы экономикалық санкцияларды жүзеге асыруға жауапты негізгі лауазымды тұлғалардың бірі саналады.
Хабарламада Бессенттің Вашингтондағы Джорджтаун ауданында орналасқан үйінен қауіпсіздігі күшейтілген әскери базаға көшірілгені айтылған.
Сондай-ақ АҚШ мемлекеттік хатшысы Марко Рубио мен қорғаныс министрі Пит Хегсетке қатысты да қосымша қауіпсіздік шаралары қабылданғаны хабарланды. Басылым дерегінше, аталған шенеуніктер күзетілетін әскери нысандарға орналастырылған.
Дональд Трамптың көпшілік алдындағы іс-шаралары азайған
Израильдік басылымның мәліметінше, ықтимал қастандық қаупіне байланысты Дональд Трамптың көпшілік алдындағы, әсіресе ашық аспан астында өтетін іс-шараларының саны қысқарған.
АҚШ президенті қатысатын жиындарда бұрынғы қауіпсіздік шараларына қосымша арнайы қорғаныс жүйелері қолданылып жатқаны айтылды.
Олардың арасында ұшқышсыз ұшу аппараттарынан төнетін қауіптің алдын алуға арналған техникалық құралдар да бар.
Израильдік және америкалық дереккөздердің айтуынша, бұл шаралар президент пен оның әкімшілігіндегі жоғары лауазымды тұлғалардың қауіпсіздігін қамтамасыз ету мақсатында қабылданған. Алайда қандай іс-шаралардың тоқтатылғаны немесе қауіпсіздік шараларының қанша уақытқа созылатыны туралы толық ақпарат берілмеген.
