Мексика Қарулы Күштері елдегі ең ірі есірткі картельдерінің бірінің жетекшісі — «Эль Менчоны» жойды. Оның өлімі жаппай тәртіпсіздіктер мен зорлық-зомбылықтың өршуіне себеп болды. Халиско штатында төтенше жағдай режимі енгізілді, деп хабарлайды Arasha.kz.
Мексика Қарулы Күштері жүргізген арнайы операция нәтижесінде елдегі ең ірі есірткі картельдерінің бірінің көшбасшысы, «Эль Менчо» (El Mencho) лақап атымен танымал Немесио Осегера Сервантес өлтірілді. Бұл туралы жексенбі, 2026 жылғы 22 ақпанда Мексика үкіметі хабарлады.
Қылмыстық жолы: Көптеген жылдар бойы «Эль Менчо» «Халисконың жаңа буыны» (CJNG) картелін басқарып келді. The New York Times (NYT) басылымының жазуынша, ол мемлекеттік қауіпсіздік күштерімен тікелей қақтығысудан қорықпайтын елдегі ең қатыгез қылмыскерлердің бірі ретінде танылған. Картель Америка Құрама Штаттарына есірткінің (негізінен кокаин, метамфетамин және фентанил) ірі партияларын жеткізумен айналысқан.
Операция мәліметтері: NYT дереккөздерінің хабарлауынша, Осегера картельдің негізі қаланған және басты базасы орналасқан Халиско штатындағы Тапальпа қаласында өлтірілген. Вашингтондағы Мексика елшілігі бұл әскери операция үшін қосымша ақпаратты АҚШ тарапы бергенін мәлімдеді.
Штат губернаторы Пабло Лемус Наварро әлеуметтік желіде картель мүшелері мен Мексика Қарулы Күштері арасындағы қақтығыс фактісін растады.
Қауіпсіздік қызметкерлері пайда болған бойда, картельмен байланысты белгісіз тұлғалар операцияға кедергі жасау үшін көліктерді өртеп, жолдарды блоктай бастаған.
АҚШ-тың Мексикадағы елшілігі Халиско, Тамаулипас, Мичоакан, Герреро және Нуэво-Леон штаттарында жүрген өз азаматтарына пана тауып, көшеге шықпауға кеңес берді. Сондай-ақ, Гвадалахара әуежайында үрей туындап, бірнеше американдық авиакомпаниялар рейстерін тоқтатты.
