Бәсекелестікті қорғау және дамыту агенттігінің Астана қаласы бойынша департаменті «Қазақстан темір жолы» ҰК» АҚ қызметінде кәсіпкерлікке кедергі келтіретін бәсекелестікті шектеу тәуекелдерін әшкереледі, деп хабарлайды Arasha.kz.
Бұл мәселе «АзияНефтеТранс» және «Скинест Рейл Қазақстан» секілді бизнес субъектілерінің жүк вагондарын тіркеу рәсімінің негізсіз созылып кетуіне қатысты шағымдарынан кейін белгілі болды.
Жүргізілген талдау жұмыстары көрсеткендей, қолданыстағы вагондарды тіркеу қағидаларында өтінімдерді қараудың нақты уақыт мерзімі мүлдем көрсетілмеген. Вагондарды тіркеу - оларды магистральдық теміржол желісінде пайдаланудың басты шарты болғандықтан, мұндай заңнамалық олқылық кәсіпкерлердің жұмысына тікелей кедергі келтіріп, нарық субъектілерінің инфрақұрылымға қол жеткізуін шектейді. Рәсімнің созылуы логистикалық тізбекті бұзып, бизнеске материалдық шығын келтіруі мүмкін.
Осы анықталған кемшіліктерді жою мақсатында департамент ұлттық компанияға ресми нұсқама жолдады. Енді «Қазақстан темір жолы» компаниясы жүк вагондарын тіркеу қағидаларына өзгерістер енгізіп, өтінімдерді қараудың нақты әрі ашық мерзімдерін белгілеуге тиіс.
