Астанада бірге тұрған әйелін өлтірді деп айыпталған Ержан Иманқұловқа қатысты сот процесінде күтпеген жайт орын алды. Істі қарап жатқан судья Айжан Құлбаева материалдарды прокурорға қайтарып, қосымша сараптамалар тағайындау туралы шешім қабылдады. Бұл судья бұған дейін Қуандық Бишімбаев ісі арқылы кеңінен танылған, деп хабарлайды Arasha.kz.
Сот шешіміне сәйкес, айыпталушыға қатысты бұрын жүргізілген сараптамаларда қарама-қайшылықтар бар екені анықталған. Осыған байланысты іс қосымша тергеуге жіберіліп, жаңа сараптамалар басқа мамандардың қатысуымен қайта жүргізілетін болды.
Судьяның айтуынша, қазіргі таңда айыпталушыға мәжбүрлі медициналық шара қолдану мәселесін қарастыру ерте. Себебі іс материалдарында бір-біріне қайшы келетін қорытындылар бар. Мәселен, бір психиатриялық тексеру оның жағдайы тұрақталғанын және мәжбүрлі емдеуді қажет етпейтінін көрсетсе, кейінгі кешенді сараптама керісінше, созылмалы психикалық ауытқуы бар деген қорытынды жасаған.
Осыған қарамастан, айыпталушыны күшейтілген бақылаудағы психиатриялық стационарда ұстау туралы шара өзгеріссіз қалдырылды.
Айта кетейік, бұған дейін мемлекеттік айыптаушы айыпталушыны қылмыстық жауапкершіліктен босатып, мәжбүрлі емдеуге жіберуді сұраған. Алайда марқұмның туыстары бұл ұсыныспен келіспей, сараптамаларды қайта қарауды талап еткен.
Тергеу нұсқасына сәйкес, қайғылы оқиға 2025 жылғы 19 маусымда елордадағы тұрғын үй кешендерінің бірінде болған. Айыпталушы жанжал кезінде әйеліне бірнеше рет пышақ сұғып, кейін 25-қабаттан секіріп кеткен. Ол көлікке құлап, тірі қалғанымен, ауыр жарақат алып ауруханаға жеткізілген.
