2026 жылы Орталық Азия елдері қорғанысқа бөлінетін қаржыны айтарлықтай арттырды. Аймақтағы ең ірі әскери бюджет Өзбекстанға тиесілі, деп хабарлайды Arasha.kz.
Биыл Ташкент қорғаныс саласына 6,2 млрд доллар бөлуді жоспарлап отыр. Қазақстан бұл көрсеткіш бойынша екінші орында – 5,8 млрд доллар. Қалған елдерде шығын көлемі айтарлықтай төмен.
Global Firepower рейтингіне сәйкес, Өзбекстан әскери қуаты жағынан әлемде 53-орында тұр. Бұл – өңірдегі ең жоғары көрсеткіш. Қазақстан 57-орынға жайғасқан. Түрікменстан 77-орында, Қырғызстан – 105, Тәжікстан – 108-орында.
Сарапшылар әскери әлеуеттің айырмашылығы тек қаржыға байланысты емес екенін айтады. Рейтингте әскер саны, техника, логистика және инфрақұрылым сияқты ондаған фактор ескеріледі. Осы тұрғыдан алғанда, Өзбекстан соңғы жылдары қорғаныс жүйесін күшейтуге басымдық берген.
Әсіресе авиация саласы ерекше назар аудартады. Өзбекстан армиясында 159 ұшақ пен тікұшақ бар. Оның ішінде 26 жойғыш, 13 шабуылдаушы ұшақ және ондаған көлік авиациясы бар. Бұл көрсеткіш елдің аймақтағы әскери позициясын күшейтіп отыр.
Аймақтағы әскери теңгерім біркелкі емес. Әр елдің басымдығы әртүрлі. Бірақ жалпы үрдіс анық: Орталық Азияда қорғаныс шығындары өсіп келеді. Бұл өңірдегі геосаяси жағдайдың күрделене түскенін көрсетеді.
