Америка саясатында бір қатал заң бар: сайлаушы идеологияны ұзақ тыңдауы мүмкін, бірақ қалтасындағы ақшаны тез санайды. Дональд Трамптың рейтингі жаңа минимумға түсуі – сол заңның тағы бір дәлелі. Ақ үйдің сыртқы саясаттағы қатқыл риторикасы, Ирандағы соғыс, жанармай бағасының өсуі мен инфляция енді бір нүктеде түйісті. Ол нүкте – қарапайым америкалықтың көңіл күйі, деп хабарлайды Arasha.kz.
The Washington Post, ABC News және Ipsos жүргізген сауалнамаға қарағанда, америкалықтардың 62 пайызы Трамптың саясатына көңілі толмайды. Оны қолдайтындар – 37 пайыз ғана. Бұл екі мерзім ішіндегі ең төмен көрсеткіш ретінде бағаланып отыр. Әсіресе экономика бойынша сенімнің әлсіреуі Трамп үшін ауыр соққы. Себебі оның Ақ үйге қайта оралуына дәл осы «экономиканы қалпына келтіремін» деген уәдесі үлкен рөл атқарған еді.
Қазір жағдай басқаша. Сауалнамада респонденттердің 76 пайызы өмір сүру құнының қымбаттауына наразы екенін айтқан. 72 пайызы инфляцияға қатысты саясатқа көңілі толмайды. Ал 66 пайызы Ирандағы соғысты қолдамайды. Бұл жерде мәселе тек сыртқы саясатта емес. Соғыс алыс жерде жүріп жатқанымен, оның бағасы жанармай құю бекетінде, дүкен сөресінде, отбасылық бюджетте сезіледі.
Трамптың саяси тірегі саналатын миграция тақырыбы да бұрынғыдай толық жұмыс істеп тұрған жоқ. Мексикамен шекарадағы саясатты қолдайтындар 45 пайыз болса, қарсы пікір білдіргендер 54 пайызға жеткен. Яғни президенттің ең мықты электоралдық қаруының өзі қоғамды толық иландыра алмай отыр.
Ең қауіпті белгі – тәуелсіз сайлаушылардың суи бастауы. Республикалық партияның өз ішінде Трампқа қолдау әлі де жоғары, шамамен 85 пайыз. Бірақ партиядан тыс, шешуші сәтте таразы басын өзгертетін тәуелсіз сайлаушылар арасында қолдау 25 пайызға дейін төмендеген. Америкада сайлауды тек өз жақтастарыңмен ұту қиын. Әсіресе аралық сайлау жақындағанда мұндай көрсеткіш партия үшін дабыл.
Бұл республикалықтарға Конгрестегі басымдықтан айырылу қаупін төндіреді. Демократтардың жақтастары белсендірек бола бастағаны байқалады. Тіркелген сайлаушылар арасында демократтар республикашылардан бес пайыздық тармаққа алда тұр. Мұндай айырма үлкен көрінбеуі мүмкін, бірақ АҚШ-та бірнеше штаттағы аз ғана дауыс бүкіл саяси тепе-теңдікті өзгерте алады.
Трамп феномені ұзақ уақыт бойы ашулы электоратқа, жүйеге қарсы көңіл күйге және «қатты қол» бейнесіне сүйенді. Бірақ билікте отырған адамға наразылықты басқару оңай емес. Оппозицияда жүргенде айқай – ресурс. Билікте жүргенде нәтиже керек. Ал нәтиже ретінде халық қымбат бензин, өсіп жатқан баға және сырттағы соғысты көрсе, харизма да бұрынғыдай қорған бола алмайды. Трамптың рейтингі түсті деген сөз – оның саяси дәуірі аяқталды деген сөз емес. Бірақ бұл – америкалық қоғамның шыдамы шегіне жақындағанын көрсететін белгі.
