Президент Қасым-Жомарт Тоқаев Ұлы Отан соғысының ардагері Кенжебай Маденовке «Халық қаһарманы» атағын берді, деп хабарлайды Arasha.kz.
Мемлекет басшысы қол қойған жарлыққа сәйкес, соғыста көрсеткен ерлігі мен батылдығы үшін Кенжебай Маденовке бұл атақ қайтыс болғаннан кейін берілді. Сонымен қатар оған айрықша ерекшелік белгісі – «Алтын жұлдыз» және «Отан» ордені қоса табысталды.
«Ақ Жайық» басылымының мәліметінше, соғыс кезінде Кенжебай Маденов Берлиндегі ғимараттардың үстіне алғашқылардың бірі болып Қызыл туды тіккен.
Бұл ерлік соғыстың соңғы күндері туралы кітаптарда да баяндалған. 1948 жылы жарық көрген «Штурм Берлина» еңбегінде: жараланған, қанға боялған Маденов ратушаның биік күмбезіне көтеріліп, неміс туын жұлып тастағаны, кейін әлсіреген комсорг К. Громовпен бірге Қызыл туды орнатқаны айтылады. Екеуі ту желбіреп тұрған сәтте сол жерде құлаған.
Ерлігі үшін Кенжебай Маденов кезінде Қызыл Жұлдыз орденімен марапатталған.
Соғыстан кейін ол ұзақ жылдар бойы Гурьев қаласындағы МҚК басқармасында қызмет етті. Отбасылы болып, жеті бала тәрбиелеген. Қазір ҰҚК департаментінде батырдың жеке заттары қойылған музей бар, сондай-ақ ғимаратқа ескерткіш тақта орнатылған. 2005 жылы қала әкімдігі мен мәслихат шешімімен ескі әуежай маңындағы көшелердің біріне оның есімі берілген.
Кенжебай Маденов 1974 жылы дүниеден өтті.
