Қазақстанның Тұңғыш Президенті Нұрсұлтан Назарбаевқа жоспарлы түрде жүрекке операция жасалды, деп хабарлайды Arasha.kz сайты bairak.kz-ке сілтеме жасап.
Бұл ақпаратты оның баспасөз хатшысы Айдос Үкібай растады.
Ота туралы белгілі кардиохирург Юрий Пя мәлімет берді. Оның айтуынша, операция шұғыл болмаған. Дәрігерлер оны өткен жылдан бері жоспарлаған, алайда Тұңғыш Президенттің жұмыс кестесіне байланысты кейінге шегерілген.
«Операция шамамен екі жарым сағатқа созылды және сәтті өтті. Қазіргі уақытта науқастың жағдайы тұрақты, өміріне қауіп жоқ», – деді Юрий Пя.
Дәрігерлердің айтуынша, оңалту процесі жоспар бойынша жүрсе, Нұрсұлтан Назарбаев алдағы күндері медициналық орталықтан шығарылуы мүмкін.
Айдос Үкібай да Тұңғыш Президенттің өзін қанағаттанарлық деңгейде сезініп отырғанын және дәрігерлер бақылауында екенін айтты.
Бұған дейін БАҚ пен әлеуметтік желілерде Назарбаевтың ауруханаға жатқызылғаны туралы ақпарат тараған еді. Кейін бұл мәлімет ресми түрде расталды.
