Актриса Дариға Бадықова журналист Қанат Тілеуханға берген сұхбатында театр саласына қатысты ойын бөлісті, деп хабарлайды Arasha.kz.
Өнер иесі "Ақсарай" театрын қайта құру туралы жоспары бар екенін айтып, болашақта жас құраммен жаңа шығармашылық орта қалыптастырғысы келетінін жеткізді.
"Ақсарай" театрын қайта құру туралы ой бар. Жас құрамды жасақтағым келеді. Бірақ жолын таппай тұрмын. Мүмкін, табылар. Сіз секілді адамдармен сөйлесіп, бір жолын табармыз. Атабаев атындағы театрды ашқым келеді. Өз үйіңе келген секілді көңіл күйді тудыратын театр болса екен. Мүмкін, іске асар", – деді Дариға Бадықова.
Актрисаның бұл сөзі театр сүйер қауымның назарын аударды. Себебі Болат Атабаев есімі қазақ театр өнерімен тығыз байланысты. Ол режиссер, драматург әрі қоғам қайраткері ретінде танылған тұлға. Әр жылдары Неміс драма театрында, Мұхтар Әуезов атындағы Қазақ ұлттық драма театрында қызмет атқарып, "Ақсарай" театрының көркемдік жетекшісі болған.
Болат Атабаев 1952 жылы бұрынғы Талдықорған облысы аумағында дүниеге келген. Ол қазақ театрындағы батыл режиссерлік ізденістерімен, әлеуметтік тақырыптарды сахнаға шығаруға ұмтылысымен ерекшеленді. Оның шығармашылық жолында Абайдың қарасөздері негізінде қойылған "Жұмбақ жан" және Мұхтар Әуезовтің "Қарагөз" драмасы секілді жұмыстар ерекше аталады.
1998 жылы Болат Атабаевқа "Қазақстанның еңбек сіңірген қайраткері" атағы берілді. Сол жылы "Астана" медалімен марапатталды. Кейін Қазақстан мен Германия театрлары арасындағы шығармашылық байланысты дамытуға қосқан үлесі үшін Гёте медаліне ие болды.
Болат Атабаев қоғамдық ұстанымымен де ел есінде қалған тұлға. 2011 жылы Жаңаөзендегі мұнайшылар мәселесіне қатысты пікір білдіріп, жұмысшылардың талаптарына назар аудартуға тырысты. 2012 жылы оған қатысты қылмыстық іс қозғалып, кейін қамауға алынды. Алайда сол жылы шілде айында бостандыққа шықты. Кейін бірнеше жыл Германияда өмір сүрді.
Режиссер 2021 жылы Алматыда дүниеден өтті. Ол Кеңсай зиратында жерленген.
