Reuters мәліметінше, АҚШ Иранның Ормуз бұғазы жабылды деген мәлімдемесімен келіспей отыр. Вашингтон бұл маңызды теңіз дәлізі арқылы сауда кемелері бұрынғы режимде қатынап жатқанын хабарлады, деп хабарлайды Arasha.kz.
АҚШ пен Иран өкілдері жексенбі күні Швейцарияда бейбіт келіссөздерді бастауы тиіс. Иран делегациясы келіссөз өтетін елге жетіп қойған. Ал АҚШ тарапынан кездесуге вице-президент Джей Ди Вэнс бастаған делегация қатысады.
Бұған дейін тараптар 60 күндік атысты тоқтату режиміне келіскен еді. Алайда сенбі күні Иранның Ислам революциясы сақшылары корпусы Ормуз бұғазы жабылғанын мәлімдеді.
АҚШ Орталық қолбасшылығы бұл ақпаратты жоққа шығарды. Қолбасшылықтың хабарлауынша, сенбі күні бұғаз арқылы 55 сауда кемесі өткен. Бұл кемелер әлемдік нарыққа 17 миллион баррельден астам мұнай жеткізген.
АҚШ президенті Дональд Трамп әзірге Ормуз бұғазынан өту үшін ешқандай төлем алынбайтынын айтты. Дегенмен ол бейбіт келіссөздер нәтиже бермеген жағдайда Вашингтон бұл мәселені қайта қарауы мүмкін екенін ескертті.
Иран тарапы келісім толық орындалуы керек деп отыр. Тегеранның пікірінше, атысты тоқтату тек қағаз жүзінде қалмауы тиіс және ол барлық бағытты, соның ішінде Ливандағы жағдайды да қамтуы қажет.
Fox News арнасына берген сұхбатында Джей Ди Вэнс атысты тоқтату режимі сақталады деп сенетінін мәлімдеді. Сондай-ақ ол Ормуз бұғазының шынымен жабылғанын дәлелдейтін ешқандай дерек көрмегенін айтты.
