АҚШ-та федералдық сот Әділет министрлігіне қаржыгер әрі сексуалдық қылмыстары үшін сотталған Джеффри Эпштейн ісіне қатысты материалдардың бір бөлігін 2 шілдеге дейін қысқартусыз жариялауды міндеттеді, деп хабарлайды Arasha.kz.
Егер ведомство бұл талапты орындай алмаса, құжаттардың не себепті құпия күйінде қалып отырғанын көпшілік алдында түсіндіруі тиіс.
Мұндай шешімді судья Эммет Салливан журналист Кэти Фанның талап-арызы бойынша шығарды. Ол Әділет министрлігін Эпштейн ісіне қатысты ақпаратты негізсіз жасырып отыр деп айыптаған.
Сот АҚШ президенті Дональд Трамп әкімшілігінің 2025 жылы қабылданған "Эпштейн файлдарының" ашықтығы туралы заң талаптарын бұзғанын көрсетті. Бұл заң билікті құпия мәртебесі жоқ барлық материалдарды 30 күн ішінде жариялауға міндеттейді. Тек жәбірленушілерді қорғау, жалғасып жатқан тергеулер мен ұлттық қауіпсіздікке қатысты деректер ғана жарияланбауы мүмкін.
Әділет министрлігі бірқатар жауап алу хаттамаларын, кейбір электрондық хаттардағы жіберушілер мен алушылардың есімдерін, сондай-ақ айыптау материалдарында көрсетілген Эпштейннің болжамды сыбайластарының аты-жөнін ашуы керек.
Құжаттар арасында Дональд Трампты зорлық-зомбылық жасады деп айыптаған әйелдің жауап алу хаттамалары да бар екені айтылды. Ақ үй басшысы бұл айыптауларды жоққа шығарады.
Джеффри Эпштейн АҚШ-тағы ең резонансты қылмыстық істердің біріне қатысы бар қаржыгер ретінде белгілі. 2008 жылы ол кәмелетке толмаған қызды жезөкшелікке тарту ісі бойынша кінәсін мойындап, түрмеге қамалған.
2019 жылы Эпштейн адам саудасы және қыздарды жүйелі түрде сексуалдық қанауға тарту айыптары бойынша қайта ұсталды. Алайда үкім шыққанға дейін тергеу изоляторында өзіне қол жұмсады.
2026 жылғы 30 қаңтарда АҚШ-та Эпштейн ісіне қатысты архивтік материалдардың жаңа бөлігі, соның ішінде хат алмасулар, фотосуреттер мен бейнежазбалар жарияланған болатын.
