Ресейдің Сыртқы істер министрі Сергей Лавров АСЕАН саммиті аясында Манилада АҚШ Мемлекеттік хатшысы Марко Рубиомен кездесті. Келіссөз қорытындысы бойынша екі тарап Украинадағы жағдайға қатысты диалогты жалғастыруға дайын екенін мәлімдеді. Ал Рубио бұл бағытта жаңа тәсілдер қажет екенін айтты, деп хабарлайды Arasha.kz, gazeta.ru-ға сілтеме қалдырып.
Осыған байланысты Кремль Ресей мен АҚШ өкілдерінің бетпе-бет кездесулері жуық арада қайта жалғасады деген үміт білдірді. Алайда Вашингтон шынымен келіссөздерге қайта оралуға дайын ба және АҚШ ұсынуы мүмкін «жаңа тәсілдер» қандай болуы ықтимал деген сұрақтар күн тәртібінде тұр.
Кремль АҚШ-пен келіссөздердің жалғасуына үміттенеді
Ресей президентінің баспасөз хатшысы Дмитрий Песков Мәскеу мен Вашингтон арасындағы байланыс жұмыс арналары арқылы жалғасып жатқанын айтты.
Оның сөзінше, АҚШ-тың келіссөз жүргізушілері қолайлы уақыт тапқан кезде, Ресеймен тікелей кездесулер қайта жалғасуы мүмкін.
«Біз америкалық тараппен жұмыс арналары арқылы диалогымызды жалғастырып жатырмыз. Америкалық келіссөз жүргізушілердің мүмкіндігі туған кезде олар Мәскеуге келіп, бетпе-бет пікір алмасуды жалғастырады деп үміттенеміз», - деді Песков.
Бұл мәлімдеме Сергей Лавров пен Марко Рубионың Маниладағы кездесуінен кейін жасалды.
Ресей тарапының мәліметінше, кездесуді бұл жолы АҚШ бастамашылық еткен. Тараптардың әңгімесі шамамен 35 минутқа созылған.
Лавров Рубиоға не айтты?
Ресей Сыртқы істер министрлігінің хабарлауынша, Сергей Лавров келіссөз барысында Украинадағы әскери жағдай туралы ақпарат беріп, Батыстың Киевке қару-жарақ жеткізуін жалғастыруға болмайтынын жеткізген.
Сонымен қатар Ресей тарапы Украинадағы қақтығысты саяси-дипломатиялық жолмен реттеуге дайын екенін тағы бір мәрте мәлімдеді.
Министрлік таратқан хабарламада:
«Лавров Ресейдің саяси-дипломатиялық жолмен реттеу ұстанымын тағы да растады. Сондай-ақ АҚШ тарапы Анкориджде Ресей президенті Владимир Путин мен АҚШ президенті Дональд Трамптың кездесуінде ұсынған бастамаларға Ресей тарапының келісім бергенін еске салды», - делінген.
Кездесу барысында Украинадан бөлек, екі елдің дипломатиялық өкілдіктерінің жұмысын қалыпқа келтіру мәселесі де талқыланған.
Тараптар сыртқы саясат ведомстволары арасындағы байланысты жалғастыру жөнінде келісімге келген.
Зеленский АҚШ өкілдерімен сөйлесті
Лавров пен Рубио кездесуінің алдында, 22 шілдеде, Украина президенті Владимир Зеленский АҚШ президентінің арнайы өкілдері Стив Уиткофф пен Джаред Кушнермен телефон арқылы сөйлесті.
Axios басылымының журналисі Барак Равидтің хабарлауынша, тараптар Украинадағы жағдайды дипломатиялық жолмен реттеу бойынша келіссөздерді қайта бастау мүмкіндігін талқылаған.
Сонымен қатар Зеленскийдің АҚШ-қа барып, сенатор Линдси Грэмді соңғы сапарға шығарып салу рәсіміне қатысуы және сол сапар барысында Дональд Трамппен кездесуі мүмкін екені айтылды.
АҚШ қандай «жаңа идеяларды» ұсынып отыр?
Маниладағы келіссөзден кейін Марко Рубио кездесуді «ашық әрі нәтижелі әңгіме» деп бағалады.
Сонымен бірге ол Украинадағы қақтығысты тоқтату үшін бұрынғы тәсілдер жеткіліксіз екенін айтып, жаңа ұсыныстар қажет екенін мәлімдеді.
«Бейбітшілікке тек жаңа идеялар мен жаңа тұжырымдамалар арқылы қол жеткізуге болады. Егер қолайлы жағдай қалыптасса, біз осындай ұсыныстарды ортаға салуға дайынбыз», - деді Рубио.
Мемлекеттік хатшының айтуынша, АҚШ Украинадағы қақтығысты бейбіт жолмен шешуге ықпал ететін кез келген мүмкіндікті пайдалануға ниетті.
Ресейде бұл мәлімдемені қалай қабылдады?
Ресейлік саясаттанушылар Марко Рубионың «жаңа идеялар» туралы сөзін Мәскеуге бағытталған ишара ретінде бағалады.
Саясаттанушы Константин Блохиннің пікірінше, Вашингтон айтып отырған «жаңа тәсілдер» іс жүзінде Ресейден қосымша ымыра күтетінін білдіреді.
«Мұнда бәрі түсінікті. "Жаңа идеялар" дегеніміз - Ресейден жаңа жеңілдіктер күтіледі деген сөз. Себебі АҚШ-тың назары қазір Украинадан гөрі Иранға ауып кетті. Ал Еуропа Украинаға қаржылай әрі әскери қолдау көрсетуді жалғастырып отыр. Сондықтан "жаңа идеялар" дегеннің астарында Ресейдің жаңа ымыраларға баруы жатыр», - деді Блохин.
