Аты аңызға айналған футболшы Лионель Месси Аргентина ұлттық құрамасындағы мансабын аяқтайтынын мәлімдеді. Ол Instagram парақшасында жанкүйерлерімен қоштасу хатын жариялады, деп хабарлайды Arasha.kz.
"Финалдан бері біраз уақыт өтті. Ұзақ ойланғаннан кейін ұлттық құрамадағы мансабымды аяқтайтынымды баршаңызға айтқым келеді. Бұл шешім маған ауыр тиді және әлі де жанымды ауыртады. Бірақ дәл қазір кететін уақыт келгенін түсіндім. Соңғы бірнеше жылда бәрін жеңіп жүрген кезімізде ғана емес, оған дейін де әрдайым бар күшімді салғаныма ант етемін. Осы жейде үшін үнемі күрестім, барымды салдым. Сіздерге қуаныш сыйлап, футбол арқылы аргентиналық екендеріңізді мақтан тұтқым келді", – деп жазды футболшы.
Месси ұлттық құрамамен қоштасу өзіне ерекше ауыр тиіп отырғанын атап өтті.
"Мен ұлттық құраманың бір бөлігі болуды жақсы көрдім, қазір де жақсы көремін және әрқашан жақсы көретін боламын. Қолымнан келгеннің бәрін бердім, енді берерім қалмады. Оның үстіне артымыздан бұл жерде ойнауға лайық өте мықты жас футболшылар келе жатыр.
Осы 20 жыл бойы көрсеткен махаббаттарыңыз бен қолдауларыңыз үшін рақмет. Сіздердің сөздеріңізді қатты сағынатын боламын. Енді мен де сіздердің біріңіз болып, команданы сырттан қолдаймын – қуанышты сәттерде де, қиын кезеңдерде де", – деді Месси.
Футболшы отбасы мен жақындарына да алғыс білдірді.
"Әрдайым жанымнан табылып, осынау керемет, бірақ қиын жолда менімен бірге болған отбасымның әр мүшесіне алғыс айтамын. Осы жолды бірге жүріп өту бақыты бұйырған әрбір бапкерге, командаласыма және менеджерге рақмет. Өзіммен бірге ұмытылмас естеліктер мен сәттерді алып кетемін", – деп жазды Лионель Месси.
Аңыз футболшы ұлттық құрамадан тыныш көңілмен әрі мақтаныш сезімімен кетіп бара жатқанын жеткізді.
"Сіздерге және командаластарыма өзім тіпті армандамаған сәттерді сыйлай алдым. Осының бәрін сіздермен бірге бастан өткеру керемет болды. Баршаңызды жақсы көремін! Мені аргентиналық етіп жаратқаны үшін Құдайға рақмет. Алға, Аргентина! Бұл сөздерді 21 шілдеде, финалдан екі күн өткен соң жаздым. Бүгін әкеммен болған жағдайдан кейін бұл шешімімнің дұрыс екеніне бұрынғыдан да анық көз жеткіздім", – деп қосты футболшы.
