Қырғызстанда 2027 жылы өтетін президент сайлауына қатысуға 11 адам ниет білдірді. Олардың арасында қазіргі мемлекет басшысы Садыр Жапаров, бұрынғы депутаттар, мемлекеттік қызметкерлер мен кәсіпкерлер бар, деп хабарлайды Arasha.kz.
Қырғызстанның Орталық сайлау комиссиясы 13 қарашада президенттікке үміткерлерді ұсыну кезеңі аяқталғанын мәлімдеді. Алдын ала қорытынды бойынша мемлекет басшысы лауазымына 11 азамат өтініш берген.Дегенмен олардың барлығы әзірге ресми кандидат ретінде тіркелген жоқ. Сайлауға қатысу үшін үміткерлер заңнамада белгіленген талаптарды орындауы тиіс.
Атап айтқанда, әрбір кандидат кемінде 30 мың сайлаушының қолдауын жинауға міндетті. Электрондық қолтаңба жинау кезеңі 8 желтоқсанға дейін жалғасады. Ал тіркеуге қажетті құжаттарды тапсыру мерзімі 13 желтоқсанда аяқталады. Орталық сайлау комиссиясы үміткерлерді тіркеу рәсімін 23 желтоқсанға дейін жүргізеді.
Қырғызстанда президент сайлауы 2027 жылғы 27 қаңтарға белгіленген.
Қырғызстан президенттігіне кімдер үміткер?
24.kg басылымының мәліметінше, президенттікке таласуға ниет білдірген азаматтардың арасында саяси тәжірибесі бар тұлғалар да, кәсіпкерлік саласында еңбек еткен адамдар да кездеседі.
Аймен Касенов – кәсіпкер. Ол бұған дейін де Қырғызстан президенті лауазымына үміткер болуға талпынған.
Азамат Эсенбеков – экономист, салық саласында қызмет атқарған және жергілікті атқарушы билік жүйесінде жұмыс істеген бұрынғы әкім.
Сыймык Жапыкеев – сыбайлас жемқорлыққа қарсы мәлімдемелерімен танылған қоғам қайраткері. Ол «Чоң Казат» қозғалысы арқылы көпшілікке белгілі. Әлеуметтік желідегі белсенділігімен және өткір пікірлерімен ерекшеленеді.
Акай Кыдыров – Жапонияда жұмыс тәжірибесі бар кәсіпкер. Ол президенттікке өтініш бергендердің ішіндегі ең жас үміткер ретінде аталып отыр.
Исхак Масалиев – Қырғызстан саясатындағы тәжірибелі тұлғалардың бірі. Бұған дейін парламентте қызмет атқарған саясаткердің есімі елдің қоғамдық-саяси өмірінде кеңінен белгілі.
Садыр Жапаров – Қырғызстанның қазіргі президенті. Ол мемлекет басшысы қызметін жалғастыру мақсатында кезекті президент сайлауына қатысуға ниет білдірді.
Бактыбек Калмаматов – Қырғызстан парламентінің бұрынғы депутаты. Ол бұған дейін де президенттік сайлауға қатысқан.
Бакытбек Адылов – бұрынғы қала әкімі және мемлекеттік көші-қон қызметінің экс-басшысы.
Амур Айба Медер – кәсіпкер. Оның саяси қызметі мен алдағы сайлау бағдарламасы туралы ашық ақпарат әзірге шектеулі.
Мамбетжунус Абылов – Қырғызстан Орталық сайлау комиссиясының бұрынғы басшысы. Ол кезінде сайлау процесін ұйымдастыруға жауапты мекемені басқарса, енді президенттік додаға қатысуға ниет білдіріп отыр.
Клара Сооронкулова – президенттікке ұсынылған азаматтардың арасындағы жалғыз әйел. Ол бұған дейін Қырғызстанның Конституциялық палатасында судья қызметін атқарған.
