"Самұрық-Қазына" ұлттық әл-ауқат қорының басқарма төрағасы Нұрлан Жақыпов пен «Қазақстан темір жолы» ұлттық компаниясының басшысы Елжас Отыншиев сот санкциясымен қамауға алынды. Екі басшы да сыбайлас жемқорлық қылмысын жасады деген күдікке ілінген.
Бұл ақпаратты Қазақстан Республикасы Ұлттық қауіпсіздік комитетінің баспасөз қызметі растады.
Ведомство мәліметінше, Нұрлан Жақыпов пен Елжас Отыншиев 12 қарашада уақытша ұстау изоляторына қамалған.
Ал екі күннен кейін, 14 қарашада тергеу соты оларға қатысты қамауда ұстау түріндегі бұлтартпау шарасын санкциялаған.
«12 қарашада аталған тұлғалар сыбайлас жемқорлық қылмысын жасады деген күдікпен уақытша ұстау изоляторына қамалды. 14 қарашада тергеу сотының санкциясымен оларға қатысты қамауда ұстау түріндегі бұлтартпау шарасы таңдалды», – делінген ҰҚК хабарламасында.
Ұлттық қауіпсіздік комитетінің мәліметінше, қазіргі уақытта аталған іс бойынша сотқа дейінгі тергеу амалдары жүргізілуде. Әзірге күдіктілерге қатысты қылмыстық істің нақты мән-жайы жарияланған жоқ.
Сонымен қатар қандай әрекеттерге байланысты сыбайлас жемқорлық күдігі туындағаны және істің басқа да егжей-тегжейі туралы қосымша ақпарат берілмеді.
ҰҚК өкілдері Қазақстан Республикасы Қылмыстық-процестік кодексінің 201-бабына сәйкес сотқа дейінгі тергеу деректерінің жария етілуіне шектеу қойылатынын ескертті.
Осы себепті ведомство әзірге өзге ақпарат таратпайтынын мәлімдеді.