Елде киноиндустрия саласына бөлінген қаражат дұрыс игерілмей келеді. Кейінгі бес жылда «Ұлттық киноны қолдау орталығы» арқылы 103 жобаға мемлекеттен 19 миллиард теңге қаржы бөлінген. Қазынадан бөлінген сомаға 10% мөлшерде режиссерлердің гонорары да төленгенін қоса кеткен жөн. Бұл қаржыға 98 фильм түсірілді. Алайда Мәдениет және ақпарат министрлігі жүргізген талдау көрсеткендей, олардың басым бөлігі көрерменге жетпеген. Прокатқа шыққаны – небәрі 23 картина, деп хабарлады 24KZ.

Министрліктің хабарлауынша, мемлекеттік қолдауға ие болған фильмдердің көпшілігі фестивальдер мен конкурстар үшін түсіріледі. Режиссерлер көп жағдайда жеке амбицияларына басымдық беріп, аудитория сұранысын ұмытып кетіп жатады. Бүгінге дейін кассалық жинақ көлемі небәрі 1,5 млрд теңге.

Мәселен, бюджеттен 500 миллион теңге бөлінген «Бесмойнақ» фильмі әлі күнге дейін көрермен назарына ұсынылмаған. «Бату. Тарихи детектив» атты киноға 192 млн теңге бөлінген. Жоба 2021 жылы аяқталған, бірақ қалың көрермен бұл фильммен де таныс емес. Ал «Боксер» фильміне 900 миллион теңге беріліп, прокатта небәрі 25 миллион теңге жинаған. Ал «Жизнь» картинасының түсіріліміне бөлінген 500 миллион теңгенің 650 мың теңгесі ғана қайтқан. Режиссер Бекболат Шекеровтың «Лето 1941-го года» көркем фильмін түсіруге 697 млн теңгеден астам қаражат бөлінді. Кассада туынды тек 40,6 млн теңге жинады. 340 млн теңгеге түсірілген «Бүркіт» фильмінен небәрі 254 мың теңге түскен.

Анимация саласы да көрерменге жол таппаған. Кейінгі бес жылда түсірілген мультфильмдердің басым бөлігі әлі күнге дейін прокатқа шықпаған. «Кенже қыз» туындысына 232,8 млн теңге бөлінген, «Караван историй» мультфильміне 213,9 млн теңге көлемінде қолдау көрсетілсе, «Бесік жырына» 32,4 млн теңге берілген.

Сондай-ақ министрлік қазір жағдайы ақсап тұрған «Қазақфильм» мемлекеттік киностудиясына қолдау көрсетпек. Бұл қазақстандық кинематографияның әлемдік аренадағы орнын нығайтуға және дарынды қазақстандық кинематографистердің жолын ашуға мүмкіндік бермек.