Алматының бұрынғы әкімі Бауыржан Байбектің кланы Қоспаевтың ұйымдасқан қылмыстық тобының (ҰҚТ) қылмыстық схемаларына қатысқан.
Бауыржан Байбектің әкесі — Қыдырғали Байбек басқаратын клан Елдос Қоспаевтың ұйымдасқан қылмыстық тобының (ҰҚТ) мүлік жымқыру схемасына белсенді түрде қатысқан. Бұл туралы ҚазТАГ агенттігі хабарлады.
Сот үкімінде:
«Қоспаев Е. және оның ұйымдасқан тобының мүшелері 2019 жылғы 8 сәуір мен 2020 жылғы 23 желтоқсан аралығында “AV-Construction” ЖШС-нің мүлкін ұрлап, үшінші тұлғаларға жылжымайтын мүлік нысандарын өзіндік құнынан төмен бағада сатып жіберген. Бұл компания мен оның заңды иелеріне залал келтірді. Атап айтқанда, Абижанов Д., Танашев Т. және Бабаев Р. Қоспаев Е. және басқа тұлғалармен келісіп, пайдалануға берілген және құрылысы жүріп жатқан нысандарды Алматы қаласының бұрынғы әкімі Бауыржан Байбектің әкесі — Байбек Қыдырғалиға өзіндік құнынан төмен бағамен сатуға шешім қабылдаған», – делінген.
Бұл мәміле бойынша үш нысан таңдалып, 1 шаршы метрі 230 мың теңгеден 425 мың теңгеге дейін бағаланған. Бұл құрылыс өзіндік құнынан әлдеқайда төмен сома.
2019 жылғы 8 сәуірде Елдос Қоспаев Алматы қаласындағы «AV-Construction» ЖШС кеңсесінде ұйымдасқан топ мүшесі Бабаевқа Каппарова көшесі 116/9 мекенжайындағы №14 пәтерді Байбек Қыдырғалиға өзіндік құнынан төмен бағамен — 43 586 000 теңгеге сату туралы тапсырма берген. Бабаев Қоспаевтың нұсқауын орындап, аталған пәтерді сатуға келісімшарт жасасқан.
2020 жылғы 23 желтоқсанда Қоспаев қайтадан екі коммерциялық нысанды Байбек Қыдырғалиға төмен бағада сатуды тапсырған:
Каппарова көшесі 116/24, №32 — 121,6 ш.м, бағасы: 50 206 027 теңге;
Каппарова көшесі 116/24, №33 — 97,6 ш.м, бағасы: 40 464 621 теңге.
Сот бұл әрекеттердің кәсіпорын мен оның иелеріне 65 946 191 теңге көлемінде залал келтіргенін мәлімдеді.
Еске сала кетсек, 2022 жылғы 9 маусымда ҚазТАГ Бауыржан Байбектің Түркияда жүргенін хабарлаған. Ол отбасымен бірге Дубайға билет алып, қайту мерзімі өткеннен кейін елге оралмаған. 2022 жылғы 24 қыркүйекте Байбекке қатысты қылмыстық іс қозғалғаны белгілі болды. 2023 жылғы 11 қаңтарда ол Германияның Любек қаласында байқалған. 2023 жылғы 14 қазанда Токаев оның бұрынғы жұбайы Жанар Байбекті Астана қалалық сотынан жұмыстан босатты. Жақында Байбек Жапониядан байқалды. Ол экс-президент Нұрсұлтан Назарбаевтың сенімді адамдарының бірі саналады.
